Një nga figurat më të fuqishme dhe më të diskutuara të politikës dhe botës financiare moldave, oligarku Vladimir Plahotniuc, është arrestuar në aeroportin “Eleftherios Venizelos” në Athinë, teksa përpiqej të largohej drejt Dubait.
Plahotniuc është i kërkuar ndërkombëtarisht nga INTERPOL, pasi akuzohet për një nga skandalet më të mëdha të korrupsionit në Europën Lindore — zhdukjen e 1 miliard eurove nga sistemi bankar moldav mes viteve 2014–2019, një shumë që përfaqëson 12% të PBB-së së Moldavisë.
Rrjeti i falsifikimeve dhe identitetet e shumëfishta
Ish-kreu i Partisë Demokratike të Moldavisë rezulton të ketë katër pasaporta: moldave, rumune, ruse dhe së fundmi edhe dokumente identiteti meksikane të falsifikuara, të marra përmes një shtetasi meksikan në emër të një gruaje ruse që jeton në Dubai, Irina Ustina.
Pas largimit nga Moldavia në vitin 2019, ai jetoi në Turqi dhe më pas u vendos në një vilë luksoze në periferinë jugore të Athinës, ku bashkëjetonte me Elizaveta Kuznetsova, fituese e titullit “Miss Moldavia 2019”.
Operacioni zgjeron goditjen: Arrestohet edhe Konstantin Tutu
Në të njëjtën operacion, autoritetet greke arrestuan edhe ish-deputetin moldav dhe boksierin e njohur Konstantin Tutu, i cili ishte në kërkim nga autoritetet ruse për pjesëmarrje në organizatë kriminale të trafikut të drogës.
Tutu posedonte kartë identiteti greke të falsifikuar, të lëshuar në vitin 2023, si dhe një pasaportë dhe patentë me të dhëna të rreme.
Sekuestrim pasurish në Europë
Deri tani, janë sekuestruar prona luksoze të Plahotniuc në Zvicër dhe Alpet Franceze, si pjesë e hetimeve ndërkombëtare që përfshijnë disa agjenci ligjzbatuese evropiane.
Kush është Vladimir Plahotniuc?
Një oligark moldav dhe ish-kreu i Partisë Demokratike, i njohur për ndikimin e madh në politikën dhe ekonominë moldave mes viteve 2014–2019.
Pse u arrestua në Greqi?
Sepse ishte në listën e kuqe të INTERPOL-it për korrupsion dhe përfshirje në zhdukjen e 1 miliard eurove.
Ku ishte vendosur më herët?
Pas largimit nga Moldavia në 2019, qëndroi në Turqi dhe më pas në një vilë luksoze në Athinë.
Kush ishte me të në momentin e arrestimit?
Ish-Miss Moldavia 2019, Elizaveta Kuznetsova.
Kush tjetër u arrestua?
Konstantin Tutu, ish-deputet dhe boksier moldav, për trafik droge dhe dokumente të falsifikuara.