Irani ka bërë të qartë se nuk ka ndërmend të heqë dorë nga programi i tij bërthamor, pavarësisht dëmeve të rënda që ka pësuar nga sulmet ajrore amerikane muajin e kaluar. Në një intervistë për televizionin Fox News, ministri i Jashtëm iranian, Abbas Araghchi, theksoi se pasurimi i uraniumit është ndalur përkohësisht për shkak të dëmeve të mëdha në infrastrukturën bërthamore, por që vendi nuk do të dorëzohet.
“Ne nuk mund të heqim dorë nga pasurimi i uraniumit. Kjo është një arritje kombëtare dhe një krenari për shkencëtarët tanë,” deklaroi Araghchi. Sipas tij, çdo marrëveshje e re bërthamore duhet të përfshijë të drejtën e Iranit për pasurim uraniumi.
Ministri iranian nuk dha informacion të saktë nëse materiali i pasuruar është ruajtur gjatë sulmeve, por theksoi se Organizata e Iranit për Energji Atomike po bën vlerësime për situatën aktuale. Më 22 qershor, SHBA bombardoi tri qendra bërthamore në Iran, për të mbështetur ofensivën 12-ditore të Izraelit. Objektivat përfshinin edhe qendrën kryesore të pasurimit në Fordo, pranë Teheranit.
Presidenti amerikan Donald Trump deklaroi se sulmet ishin të suksesshme dhe “qendrat u shkatërruan plotësisht”. Megjithatë, Araghchi theksoi se programi bërthamor iranian do të vazhdojë dhe se vendi është i gatshëm për bisedime me Gjermaninë, Francën dhe Mbretërinë e Bashkuar. Bisedimet janë planifikuar të zhvillohen në Stamboll të premten.
Lidhur me mundësinë e dialogut me SHBA-në, ministri tha se Irani nuk është gati për bisedime direkte për momentin, por është i hapur për çdo formë ndërtimi besimi që mund të çojë në heqjen e sanksioneve amerikane.
Araghchi pranoi gjithashtu se Irani do të vazhdojë zhvillimin dhe prodhimin e raketave, pavarësisht përdorimit të tyre gjatë konfliktit të fundit me Izraelin. Ai u shpreh se Irani ka ende “mjaftueshëm raketa për t’u mbrojtur”.
Sa i përket shëndetit të liderit suprem, Ayatollah Ali Khamenei, i cili nuk është parë publikisht pas sulmeve, Araghchi mohoi spekulimet, duke thënë se “ai është në gjendje shumë të mirë shëndetësore dhe aktiv në vendimmarrje”.
Deklaratat e ministrit iranian theksojnë se Irani nuk do të tërhiqet nga rruga e vet bërthamore, pavarësisht presionit dhe sulmeve ndërkombëtare, duke e konsideruar këtë proces si thelbësor për sovranitetin dhe krenarinë kombëtare.