Një ngjarje tronditëse dhe e paprecedentë ka ndodhur në aeroportin Josep Tarradellas Barcelona-El Prat, ku një çift ka braktisur djalin e tyre 10-vjeçar në terminal, vetëm sepse pasaporta e tij kishte skaduar dhe nuk mund të udhëtonte me ta.
Sipas mediave ndërkombëtare, videoja e shpërndarë në TikTok nga një kontrollore e trafikut ajror zbuloi detajet: çifti kishte zgjedhur të mos humbiste fluturimin drejt vendit të tyre të origjinës dhe kishte lënë fëmijën në terminal, duke thirrur një të afërm që ta merrte më vonë.
“Pasaporta spanjolle e fëmijës kishte skaduar dhe ai kishte nevojë për vizë për të hyrë në vendin e destinacionit. Meqë nuk e kishin, vendosën të mos e prisnin dhe e lanë në terminal,” – tha kontrollorja.
Stafi i aeroportit e gjeti fëmijën të vetëm dhe të tronditur, duke njoftuar menjëherë autoritetet. Djali tregoi se prindërit ishin nisur për pushime me një tjetër fëmijë më të vogël.
Piloti, sapo u informua për situatën, bëri një njoftim në kabinë duke pyetur nëse dikush kishte harruar një fëmijë. Në fillim askush nuk reagoi, por më vonë prindërit u identifikuan.
Autoritetet urdhëruan kthimin e avionit, dhe pas uljes, çifti u shoqërua nga policia në komisariat për të marrë të birin. Deri më tani nuk ka një deklaratë zyrtare nëse do të ngrihet ndonjë akuzë penale ndaj tyre, por reagimet në rrjetet sociale kanë qenë të ashpra, me qytetarë që e quajnë aktin “braktisje të pajustifikueshme” dhe “shkelje flagrante të të drejtave të fëmijës”.
Ngjarja ka hapur një debat të fortë etik dhe ligjor për përgjegjësinë prindërore dhe trajtimin e fëmijëve në raste të tilla emergjente, ndërsa pritet reagimi zyrtar i autoriteteve spanjolle.