Një nga kompanitë më të mëdha të teknologjisë së informacionit në Shqipëri, “Soft & Solution”, është bërë objekt kontrollesh nga oficerët e Byrosë Kombëtare të Hetimit (BKH). Tensioni u rrit në zyrat e biznesmenit Ermal Beqiri, ndërsa hetuesit sekuestronin dokumente dhe pajisje, duke ngritur pikëpyetje të mëdha mbi natyrën e hetimit.
Deri më tani, autoritetet nuk kanë konfirmuar nëse veprimet lidhen me tenderat publikë milionësh të përfituar nga kompania apo me një dosje më të gjerë hetimore që mund të përfshijë edhe sektorë të tjerë të teknologjisë dhe administratës publike.
Nga eksperti i “Meta–Prifti” tek biznesmeni i kontratave publike
Emri i Ermal Beqirit nuk është i panjohur për publikun. Ai doli në skenë në vitin 2021, kur si drejtor i IT-së në Universitetin e Tiranës dhe inxhinier elektronik, u thirr si ekspert në procesin gjyqësor të Ilir Metës në Gjykatën e Lartë. Ekspertiza e tij mbi videon “Meta–Prifti” përfundoi se pamjet ishin të përpunuara dhe të nxjerra nga konteksti – një përfundim që u bë pjesë e vendimit për shpalljen e Metës të pafajshëm.
Pas këtij episodi, Beqiri u shndërrua në një aktor kyç në tregun e IT-së, me kompaninë e tij “Soft & Solution” që u bë ndër përfituesit kryesorë të kontratave publike në fushën e teknologjisë.
Një hetim që mund të tronditë sektorin
Burime pranë organit të akuzës nuk përjashtojnë mundësinë që kontrollet të jenë pjesë e një operacioni më të madh për gjurmimin e lidhjeve mes biznesit të teknologjisë dhe tenderave shtetërorë. Nëse dyshimet për abuzime me kontratat dhe ndikim të paligjshëm në procedura konfirmohen, kjo mund të kthehet në një skandal të përmasave të mëdha.
Për momentin, as BKH dhe as “Soft & Solution” nuk kanë dhënë detaje zyrtare mbi dokumentet e sekuestruara apo qëllimin përfundimtar të hetimit. Por një gjë është e sigurt: lupa e SPAK dhe BKH po qëndron mbi një nga emrat më të fuqishëm të teknologjisë në vend.