Për dekada me radhë, Milani njihej si një klub që më shumë blinte sesa shiste lojtarë. Ish-presidenti Silvio Berlusconi, që në mesin e viteve ’80, kishte përcaktuar qartë filozofinë e tij: të mbante yjet dhe të ndërtonte ekipe të mëdha. Përjashtim bëri vetëm largimi i Rikardo Kakà-s, por edhe atëherë kur karriera e tij ishte në zbritje.
Kjo politikë ndryshoi rrënjësisht pas viteve të krizës financiare, me pronarët e rinj që ndoqën një kursim të detyruar. Shifrat e shitjeve u rritën vit pas viti, por gjithsesi nuk arritën kurrë nivelet e arritura me ardhjen e Igli Tares. Ish-drejtori i Lacios, që firmosi për Milanin më 26 maj, është kthyer në shitësin më të madh të kuqezinjve në katër dekada.
Shifrat që flasin vetë
Sipas të dhënave të publikuara nga “Corriere dello Sport”, vetëm gjatë periudhës së fundit, Milani ka arkëtuar rreth 200 milionë euro nga shitjet e lojtarëve, një rekord historik për klubin.
Shembujt më të spikatur:
- Malik Çau, i shitur për rreth 40 milionë euro, shumë mbi vlerën e tij reale të merkatos.
- Teo Hernandez, i transferuar tek Al-Hilal për 25 milionë euro, duke zgjidhur një konflikt të brendshëm.
- Noah Okafor, i cili pritet të gjenerojë mbi 20 milionë euro nga Lids Junajtid.
- Emerson Rojal, shitur për 10 milionë euro te Flamengo.
Këto lëvizje, të kombinuara me huazime me pagesë, e kanë çuar totalin në 165.5 milionë euro të garantuara, ndërsa me bonuset dhe klauzolat e blerjeve shifra mund të arrijë deri në 220 milionë euro.
Roli i Igli Tares në merkato
Tare nuk është kufizuar vetëm te shitjet. Ai ka udhëhequr një revolucion të plotë në merkaton e kuqezinjve: nga afrimi i trajnerit Masimiliano Alegri te përforcimet me shtatë lojtarë të rinj, duke e riformuar skuadrën për sezonin e ri.
Por është pikërisht në merkaton dalëse që ai ka treguar aftësitë e tij të jashtëzakonshme, duke arritur të shesë lojtarë për shifra të paimagjinueshme dhe duke gjeneruar plusvalenca të mëdha për klubin.
Historiku i shitjeve të Milanit (në milionë euro)
- 2025-2026 → 200 milionë
- 2024-2025 → 51.3 milionë
- 2023-2024 → 71.4 milionë
- 2022-2023 → 11.1 milionë
- 2021-2022 → 5.1 milionë
- 2020-2021 → 51.7 milionë
- 2019-2020 → 59.2 milionë
- 2018-2019 → 88.1 milionë
- 2017-2018 → 39.7 milionë
Krahasuar me drejtuesit e tjerë të merkatos në historinë e Milanit, Tare është tregtari më i madh i futbollistëve kuqezi në 40 vitet e fundit, duke e bërë klubin më të qëndrueshëm financiarisht.
Me një bilanc prej mbi 200 milionë eurosh, Igli Tare ka shënuar një kapitull të ri në historinë e Milanit, duke treguar se edhe një shqiptar mund të bëhet figura kyçe e financave të një prej klubeve më të mëdha të botës.
Një “Xhekpot” i vërtetë, që e kthen emrin e tij në sinonim të suksesit dhe efikasitetit në merkaton europiane.