SPAK, i cili shpesh mburret se është bastioni i drejtësisë së re, këtë herë “tregoi dhëmbët” duke arrestuar dy inspektorë të Inspektoratit Shtetëror Teknik dhe Industrial (ISHTI). Akuza? 900 mijë lekë dhe 10 mijë dollarë të futur nën tavolinë për të mos raportuar një biznes pa dokumente dhe pa licencë. Shuma që duket më shumë si pagesë mujore për një apartament në Tiranë, sesa si “afera e madhe” e korrupsionit.
Heroizmi i GJKKO-së
Gjykata e Posaçme u hodh menjëherë në veprim:
- O.J., inspektor aktiv, mori “arrest me burg”.
- L.S., ish-inspektor, shpëtoi me “arrest shtëpie”.
Një ndarje perfekte për të treguar se drejtësia di të bëjë diferencime “fine”.
Hetimet e BKH-së
Sipas SPAK, Byroja Kombëtare e Hetimit ka përdorur “metoda speciale” për të zbuluar këtë aferë të madhe: një zarfi me lekë dhe një shishe dollarësh. Hetimi kishte nisur që më 2021 dhe pas katër vitesh u arrit në konkluzionin e madh: dy inspektorë kishin marrë rryshfet për të mbyllur sytë.
Pra, ndërkohë që vendi përmbytet nga tendera qindra milionë eurosh, SPAK ka zgjedhur të shfaqë muskujt tek dy inspektorë lokalë. Një sinjal i qartë se “drejtësia e re” nuk harron të merret me detajet… edhe kur mali pjell një mi.
SPAK dhe “simbolet” e korrupsionit
Kjo histori ngre pyetje të thjeshta:
- A është ky prioriteti më i madh i SPAK-ut në një vend ku miliarda zhduken në rrugë e koncesione?
- Apo thjesht një shembull se si institucionet tona janë më të forta me të dobëtit dhe më të dobëta me të fortët?
Në fund të ditës, SPAK ka siguruar një tjetër dosje për të treguar se “askush nuk shpëton nga drejtësia” – përveç atyre që shpëtojnë gjithmonë.