Një ngjarje e rëndë ka tronditur Hollandën, ku dy vëllezër sirianë emigrantë i kanë marrë jetën motrës së tyre 18-vjeçare, pasi zbuluan se ajo kishte një të dashur.
Sipas autoriteteve, krimi është kryer me urdhër të babait të tyre, ndërsa dy vëllezërit – Mohammed, 23 vjeç dhe Muhannad, 25 vjeç – tashmë kanë dalë përpara gjykatës. Babai, Khaled, ka arritur të largohet në Siri dhe do të gjykohet në mungesë.
Viktima, Rayan Al-Jayar, ishte larguar nga banesa familjare më 22 maj 2024. Gjashtë ditë më vonë trupi i saj u gjet në një kënetë në Lelystad. Ekspertët mjeko-ligjorë zbuluan se ajo kishte gojën e mbuluar, duart e lidhura pas shpine dhe kyçet e këmbëve të shtrënguara me shirit ngjitës.
Në thonjtë e saj u gjet ADN e babait, ndërsa vëllezërit vazhdojnë të deklarojnë se ishte vetë ai që e vrau. Nga ana tjetër, edhe pse babai ka pranuar në distancë vrasjen, prokuroria mohon versionin e tij dhe e konsideron të vërtetuar se dy vëllezërit kanë qenë ekzekutorët e krimit.
Familja kishte pretenduar se vajza kishte “turpëruar familjen”, duke u bërë viktimë e një mentaliteti mizor që i kushtoi jetën.
Ngjarja ka shkaktuar tronditje të madhe në opinionin publik holandez dhe evropian, duke ringritur debatin për dhunën e skajshme brenda komuniteteve të emigrantëve myslimanë dhe krimet në emër të “nderit”.