Gjyqtarja Fiona Papajorgji është zgjedhur kryetarja e re e Gjykatës Kushtetuese, duke marrë drejtimin e institucionit për një mandat trevjeçar. Vendimi u mor pas përfundimit të procesit të zgjedhjes, ku Papajorgji ishte kandidatura e vetme në garë.
Ajo zëvendëson në këtë detyrë Holta Zaçajn, mandatit të së cilës i kishte ardhur fundi në muajin mars të këtij viti, duke krijuar vakancën në krye të Gjykatës Kushtetuese. Përfundimi zyrtar i mandatit të Zaçajt hapi rrugën për zgjedhjen e drejtueses së re të një prej institucioneve më të rëndësishme të drejtësisë në vend.
Zgjedhja e Fiona Papajorgjit vjen në një moment të ndjeshëm për sistemin e drejtësisë, ku Gjykata Kushtetuese ka qenë në qendër të vëmendjes publike për vendime me impakt të drejtpërdrejtë politik dhe institucional. Mandati i saj pritet të shoqërohet me sfida të rëndësishme, veçanërisht në raport me çështjet që lidhen me balancën e pushteteve dhe respektimin e Kushtetutës.
Me marrjen e detyrës, Papajorgji do të udhëheqë Gjykatën Kushtetuese për tre vitet e ardhshme, në një periudhë ku roli i këtij institucioni mbetet kyç për stabilitetin juridik dhe funksionimin e shtetit të së drejtës në Shqipëri.