Vlora ka mbetur pa furnizim me ujë për katër ditë me radhë, duke shkaktuar shqetësim te qytetarët dhe reagime publike. Lidhur me situatën, kryetarja e Bashkisë së Vlorës, Bruna Mersini, doli në një deklaratë për mediat, ku sqaroi se problemi lidhet me ujësjellësin dhe se ky institucion nuk është në varësi të bashkisë.
Sipas saj, bëhet fjalë për një situatë emergjente të shkaktuar nga një defekt teknik, të cilën ajo e cilësoi si “fatkeqësi natyrore”, duke theksuar se nuk duhet përdorur për qëllime politike. Kryetarja u shpreh se prioriteti është zgjidhja e problemit dhe rikthimi i furnizimit me ujë për qytetin.
Mersini bëri me dije se janë siguruar pjesë rezervë që po vijnë nga Turqia. Sipas planifikimit, avioni me pajisjet pritet të mbërrijë në orët e para të mëngjesit, ndërsa gjatë pasdites ato do të transportohen drejt Vlorës për montim dhe ndërhyrje teknike.
Ndërkohë, autoritetet po aplikojnë një zgjidhje të përkohshme. Furnizimi me ujë po realizohet pjesërisht përmes sistemit ekzistues të ujësjellësit, si edhe me ndihmën e 15 autobotëve dhe shërbimeve të emergjencës civile, të cilat po shpërndajnë ujë në zona të ndryshme të qytetit.
Paralelisht, në qytet janë zhvilluar protesta nga qytetarë të pakënaqur për mungesën e ujit, ndërsa institucionet përgjegjëse kanë deklaruar se po punojnë për normalizimin e situatës sa më shpejt të jetë e mundur.
Autoritetet kanë premtuar se pas përfundimit të ndërhyrjes teknike, furnizimi me ujë do të rikthehet gradualisht në normalitet.