Shtetet e Bashkuara kryen sulme ajrore në Venezuelë në orët e para të së shtunës, duke arrestuar më pas presidentin e vendit, Nicolás Maduro, në një operacion që ka shkaktuar tronditje të forta politike dhe diplomatike në mbarë botën. Uashingtoni e ka akuzuar Maduron se drejton një “narko-shtet” dhe se ka manipuluar procesin zgjedhor, akuza që janë hedhur poshtë nga autoritetet në Karakas dhe aleatët e tyre ndërkombëtarë.
Operacioni ushtarak dhe arrestimi i kreut të shtetit venezuelian kanë nxitur reagime të menjëhershme nga liderë dhe institucione kryesore globale, të cilët, me tone të ndryshme, kanë shprehur shqetësim për shkeljen e së drejtës ndërkombëtare, rrezikun e përshkallëzimit dhe pasojat për stabilitetin rajonal.
Ministri i Punëve të Jashtme të Francës, Jean-Noël Barrot, deklaroi se operacioni ushtarak që çoi në kapjen e Nicolás Maduro-s përbën shkelje të parimit të mos-përdorimit të forcës, një shtyllë themelore e së drejtës ndërkombëtare. Ai theksoi se Franca mbetet e bindur se asnjë zgjidhje politike e qëndrueshme nuk mund të imponohet nga jashtë dhe se vetëm popujt sovranë kanë të drejtë të vendosin për të ardhmen e tyre.
Edhe Bashkimi Evropian reagoi përmes Përfaqësueses së Lartë për Politikën e Jashtme, Kaja Kallas, e cila bëri të ditur se ka qenë në kontakt me Sekretarin amerikan të Shtetit, Marco Rubio, si dhe me përfaqësuesit evropianë në Karakas. Kallas përsëriti qëndrimin e BE-së se Maduro-s i mungon legjitimiteti politik dhe se Unioni ka mbështetur prej kohësh një tranzicion paqësor. Megjithatë, ajo nënvizoi se në çdo rrethanë duhet të respektohen parimet e së drejtës ndërkombëtare dhe Karta e Kombeve të Bashkuara, duke bërë thirrje për përmbajtje.
Ministria e Jashtme e Spanjës kërkoi shtensionim dhe qetësim të situatës, duke theksuar se çdo veprim duhet të jetë në përputhje me të drejtën ndërkombëtare dhe Kartën e OKB-së. Madridi shprehu gatishmërinë për të ofruar shërbimet e tij diplomatike në funksion të një zgjidhjeje paqësore dhe të negociuar të krizës.
Reagimi më i ashpër erdhi nga Kina, e cila dënoi fuqishëm përdorimin e forcës nga Shtetet e Bashkuara kundër një vendi sovran dhe arrestimin e presidentit të tij. Ministria e Jashtme kineze e cilësoi ndërhyrjen si sjellje hegjemoniste që shkel rëndë të drejtën ndërkombëtare, cenon sovranitetin e Venezuelës dhe kërcënon paqen dhe sigurinë në Amerikën Latine dhe Karaibe. Pekini i bëri thirrje Uashingtonit të respektojë Kartën e OKB-së dhe të ndalojë shkeljen e sovranitetit të vendeve të tjera.
Në Amerikën Latine, reagimet ishin po ashtu kritike. Presidenti i Kilit, Gabriel Boric, shprehu shqetësimin e qeverisë së tij dhe dënoi veprimet ushtarake të SHBA-së në Venezuelë, duke bërë thirrje për një zgjidhje paqësore të krizës. Ai riafirmoi angazhimin e Kilit ndaj parimeve themelore të së drejtës ndërkombëtare, përfshirë ndalimin e përdorimit të forcës, mosndërhyrjen dhe respektimin e integritetit territorial të shteteve.
Presidenti i Kolumbisë, Gustavo Petro, reagoi duke shprehur shqetësim të thellë për raportimet mbi shpërthime dhe aktivitet të pazakontë ajror në Venezuelë, si dhe për rritjen e tensioneve në rajon. Ai theksoi se Kolumbia refuzon çdo veprim ushtarak të njëanshëm që mund të përkeqësojë situatën ose të vërë në rrezik popullsinë civile, duke riafirmuar përkushtimin ndaj parimeve të Kartës së OKB-së.
Rusia e cilësoi ndërhyrjen amerikane si një akt agresioni të armatosur kundër Venezuelës. Ministria e Jashtme ruse deklaroi se justifikimet e përdorura nga SHBA-ja janë të pabazuara dhe se armiqësia ideologjike ka mbizotëruar mbi pragmatizmin dhe dialogun. Moska bëri thirrje për parandalimin e përshkallëzimit dhe mbështeti kërkesën e Venezuelës dhe të disa vendeve të Amerikës Latine për një mbledhje urgjente të Këshillit të Sigurimit të OKB-së.
Nga Lindja e Mesme, udhëheqësi suprem i Iranit, Ajatollah Ali Khamenei, përdori një gjuhë të ashpër, duke deklaruar se kur një vend përballet me përpjekje arrogante për imponim nga jashtë, duhet të qëndrojë fort dhe të mos i dorëzohet armikut. Ai theksoi se rezistenca dhe besimi te populli janë çelësi për përballimin e presioneve të jashtme.
Në Evropë, kreu i partisë Reform UK në Britani, Nigel Farage, e cilësoi ndërhyrjen amerikane si jokonvencionale dhe në kundërshtim me të drejtën ndërkombëtare, por shtoi se nëse ajo i detyron Kinën dhe Rusinë të mendojnë dy herë, mund të ketë edhe efekte pozitive. Ai shprehu shpresën që populli venezuelian të mund të hapë një kapitull të ri pa Maduron.
Ndërkohë, ministri i Jashtëm i Belgjikës, Maxime Prevot, theksoi se prioritet kryesor mbetet siguria e qytetarëve belgë, duke bërë të ditur se autoritetet diplomatike po monitorojnë nga afër situatën në koordinim me partnerët evropianë.
Reagimet e shumta dhe të forta nga e gjithë bota tregojnë se arrestimi i Nicolás Maduro-s me urdhër të administratës Trump ka hapur një kapitull të ri tensioni në marrëdhëniet ndërkombëtare, duke vënë në pikëpyetje jo vetëm të ardhmen politike të Venezuelës, por edhe respektimin e rendit juridik ndërkombëtar dhe balancat gjeopolitike globale.