Pas situatës së rëndë të krijuar në Vlorë, ku qyteti mbeti për afro pesë ditë pa furnizim me ujë të pijshëm, autoritetet kanë nisur veprimet e para procedurale për zbardhjen e plotë të ngjarjes. Defekti i ndodhur në tubacionin kryesor 1000 mm solli ndërprerjen e ujit për mijëra familje, biznese dhe institucione publike, duke shkaktuar një krizë serioze për një qytet me qendra të rëndësishme urbane dhe turistike.
Burime zyrtare bëjnë me dije se Policia ka sekuestruar pamjet e kamerave të sigurisë të një subjekti privat pranë zonës ku ndodhi defekti, me qëllim dokumentimin e saktë të momentit, rrethanave dhe çdo elementi tjetër që mund të ndihmojë në zbardhjen e ngjarjes. Këto materiale pritet t’i referohen Prokurorisë së Vlorës, e cila do t’i administrojë si pjesë e hetimit penal.
Sipas Policisë dhe Prokurorisë, çështja pritet të regjistrohet zyrtarisht për hetim, ndërsa fokusi nuk do të jetë vetëm te shkaku teknik i defektit, por edhe te mënyra e menaxhimit të rrjetit të ujësjellësit dhe përgjegjësitë institucionale që lidhen me këtë shërbim jetik.
Hetimi synon të përcaktojë nëse defekti ka ardhur si pasojë e amortizimit të tubacionit, mungesës së investimeve, neglizhencës në mirëmbajtje apo faktorëve të tjerë që mund të kenë ndikuar drejtpërdrejt në krijimin e kësaj situate. Ndërprerja disa ditore e furnizimit me ujë shkaktoi reagime të forta dhe protesta nga qytetarët, të cilët kërkuan zgjidhje të menjëhershme dhe mbajtje përgjegjësie nga institucionet përkatëse.
Autoritetet pritet të dalin me informacion të mëtejshëm në vijim, ndërsa hetimet do të përcaktojnë shkaqet dhe përgjegjësitë konkrete për krizën e ujit që paralizoi Vlorën për disa ditë.