Një operacion i zhvilluar gjatë orëve të vona të natës ka çuar në goditjen e një grupi të strukturuar kriminal që dyshohet se vepronte në fushën e trafikimit të lëndëve narkotike.
Aksioni është realizuar nga Drejtoria Vendore e Policisë Elbasan në bashkëpunim me Drejtorinë Vendore të Policisë Shkodër. Si rezultat, tre persona janë arrestuar në flagrancë.
Sipas policisë, në automjetin me të cilin lëviznin të dyshuarit janë sekuestruar rreth 45 kilogramë kanabis sativa, një armë luftarake me municion, një shumë parash dhe disa telefona celularë me karta SIM shqiptare dhe të huaja.
Operacioni është shoqëruar me ndjekjen e automjetit që dyshohej se transportonte drogën. Në hyrje të qytetit të Elbasanit, drejtuesi i mjetit ka tentuar të largohet me shpejtësi duke u futur në një rrugë të pandriçuar në periferi, por forcat e policisë kanë rrethuar zonën dhe kanë bërë të mundur neutralizimin e mjetit dhe arrestimin e tre personave.
Gjatë ndërhyrjes, një efektiv policie ka mbetur i plagosur aksidentalisht nga thyerja e një xhami, por ndodhet jashtë rrezikut për jetën.
Hetimet vijojnë, pasi dyshohet se aktiviteti i këtij grupi kriminal është shtrirë në disa qarqe të vendit. Strukturat hetimore po punojnë për identifikimin e personave të tjerë të përfshirë në rrjetin e trafikut të drogës.