Sinjalet për një marrëveshje të afërt mes SHBA-së dhe Iranit po zbehen shpejt. Nga Teherani po vijnë mesazhe se propozimi amerikan nuk po shihet si bazë reale kompromisi, por si paketë me "kërkesa të tepruara" që, sipas versionit iranian, po i çojnë negociatat drejt bllokimit.
Teherani ngre tonet ndaj Uashingtonit
Në një klimë të tensionuar, ku qarkullojnë edhe raportime se administrata e presidentit amerikan Donald Trump po përgatit sulme ndaj Iranit nëse negociatat dështojnë, misioni i Iranit pranë Kombeve të Bashkuara akuzoi SHBA-në se po e vështirëson procesin me kushte të papranueshme.
paragraphs_error_placeholder
Lëvizje diplomatike në disa drejtime
Ndërkohë, shefi i ushtrisë pakistaneze Asim Munir u takua në Teheran me ministrin e Jashtëm iranian Abbas Araghçi. Sipas një postimi në kanalin Telegram të Araghçit, palët shkëmbyen pikëpamje mbi përpjekjet dhe nismat më të fundit diplomatike për të shmangur përshkallëzimin e tensioneve.
Ky takim shihet si pjesë e një vale më të gjerë kontaktesh diplomatike, në një moment kur rajoni po ndjek me kujdes çdo sinjal për ulje apo rritje të krizës.
Bisedimet vazhdojnë, por marrëveshja nuk duket pranë
Sipas Al Jazeera, kryediplomati iranian ka zhvilluar edhe biseda telefonike me homologët e tij në Turqi, Irak, Katar dhe Oman, si edhe me sekretarin e përgjithshëm të OKB-së, Antonio Guterres.
Po sipas këtij raportimi, ka përpjekje diplomatike në disa fronte, por kjo nuk do të thotë se një marrëveshje është afër. Media nënvizon se, pavarësisht disa progresesh, diferencat mes palëve mbeten të konsiderueshme.
Rubio kërkon "plan B" për Hormuzin
Në krahun amerikan, sekretari i Shtetit Marco Rubio ka kërkuar më herët një "plan B" për hapjen e Ngushticës së Hormuzit në rast se Irani refuzon të heqë bllokadën e tij.
Rubio tha se vendet e prekura nga kjo situatë duhet të mendojnë për një plan emergjence dhe se këtë çështje e ka ngritur edhe gjatë një takimi të NATO-s në Suedi.
Për momentin, zhurma për një marrëveshje të afërt mbetet më shumë spekulative sesa e mbështetur në zhvillime konkrete.
Ajo që shihet qartë është se kontaktet diplomatike po vazhdojnë, por hendeku politik mes SHBA-së dhe Iranit mbetet i hapur.