Gjykata e Lartë mbyll çështjen Becchetti, në fuqi dënimi me 12 vite burg

0

Gjykata e Lartë ka rrëzuar rekursin e biznesmenit italian Francesco Becchetti, duke vulosur në praktikë një nga dosjet më të zhurmshme të viteve të fundit. Me këtë vendim, mbetet në fuqi dënimi me 12 vite burg i dhënë ndaj tij nga Apeli.

Gjykata e Lartë mbyll çështjen Becchetti, në fuqi dënimi me 12 vite burg

Vendimi i Gjykatës së Lartë

Sipas vendimit të bërë publik, Gjykata e Lartë ka lënë në fuqi vendimin nr. 2112 (30-2025-7758) të datës 30 shtator 2025, të dhënë nga Gjykata e Apelit të Juridiksionit të Përgjithshëm.

Kjo do të thotë se rekursi i paraqitur nga Becchetti nuk u pranua dhe dënimi i vendosur më herët nga Apeli mbetet i formës së prerë.

Si u konsolidua dënimi me 12 vite burg

Francesco Becchetti ishte dënuar përfundimisht nga Apeli me Juridiksion të Përgjithshëm me 12 vite burg.

Në këtë çështje është aplikuar neni 55 për bashkimin e dënimeve. Më herët, Gjykata e Tiranës në vitin 2022 kishte dhënë 17 vite burg ndaj tij, në një proces ku ai akuzohej për katër vepra penale.

Edhe bashkëpunëtori përfitoi ulje dënimi

Lehtësim dënimi pati edhe për Mauro De Renzis, i konsideruar bashkëpunëtor i Becchettit në këtë dosje.

Apeli vendosi për të 12 vite burg, nga 16 vite që ishin dhënë në shkallën e parë. Për pjesën tjetër të grupit, dënimet nuk u ndryshuan.

Në kërkim që prej vitit 2015

Becchetti është shpallur në kërkim nga autoritetet shqiptare që në vitin 2015.

Sipas dosjes së autoriteteve, ndaj tij janë ngritur akuza për “vjedhje duke shpërdoruar detyrën”, “krijim i skemave mashtruese”, “pastrim parash” dhe “falsifikim”.

Emri i tij lidhet prej vitesh edhe me koncesionin për ndërtimin e hidrocentralit të Kalivaçit, dhënë nga shteti shqiptar në fund të viteve ’90. Akuzat ndaj tij u bënë publike në vitin 2015, kur u lëshua urdhër arresti dhe u vendos sekuestro mbi pronat e tij, përfshirë edhe televizionin Agon Channel.

Vendimi i Gjykatës së Lartë mbyll një hallkë të rëndësishme gjyqësore për Becchettin dhe lë pa ndryshim qëndrimin e Apelit për dënimin me 12 vite burg.

Çështja mbetet një nga episodet më të debatuara në raportin mes biznesit të madh, koncesioneve dhe drejtësisë shqiptare.

Artikulli i mëparshëmKosova rikthehet te lobimi në SHBA: 600 mijë dollarë për Ballard Partners pa objektiva të qarta