UEFA po shtyn përpara një tjetër reformë të madhe në futbollin europian, këtë herë te kombëtaret. Sipas planit që pritet të marrë formë përfundimtare në shtator, nga viti 2028 mund të ndryshojë jo vetëm Liga e Kombeve, por edhe mënyra si luhen kualifikueset për Europianin dhe Kupën e Botës.
Një format i ri për Ligën e Kombeve
Sipas projektit të bërë publik, Liga e Kombeve do të riorganizohet nga katër në tre liga, me 18 kombëtare secila. Çdo ligë do të ndahet në grupe, ndërsa skuadrat do të luajnë gjashtë ndeshje ndaj pesë kundërshtarëve të ndryshëm, me skemën shtëpi–transferim.
Për shkak se UEFA ka 55 kombëtare anëtare, parashikohet që në Ligën C një nga grupet të ketë shtatë skuadra. Ky është një nga elementët që tregon se reforma po ndërtohet mbi një ekuilibër të vështirë mes logjikës sportive dhe nevojës për ta futur të gjithë hartën europiane në të njëjtën skemë.
Kualifikueset afrohen hapur me modelin e Champions
Pika më e fortë e ndryshimit lidhet me kualifikueset për Europianin. Sipas versionit të UEFA-s, ato do të ndahen në dy nivele: Liga 1 me 36 skuadra dhe Liga 2 me 18 ose 19 ekipe.
Liga 1 do të ketë tre grupe me nga 12 kombëtare. Shorti do të bazohet në vazo, ndërsa çdo ekip do të luajë gjashtë ndeshje kundër gjashtë rivalëve të ndryshëm. Skema i ngjan dukshëm fazës së ligës në Champions League, një model që UEFA po e shtrin tashmë edhe për futbollin e kombëtareve.
Si do të sigurohet kualifikimi
Sipas këtij koncepti, fitueset e grupeve në Ligën 1 do të marrin kualifikimin direkt për turneun final. Vendet e tjera do të përcaktohen përmes një sistemi play-off.
UEFA pretendon se me këtë formulë rriten ndeshjet me peshë dhe reduktohen përballjet pa interes real sportiv. Në të njëjtën kohë, institucioni europian thotë se synon të mbajë të hapur një rrugë kualifikimi edhe për kombëtaret më të dobëta.
Vendimi pritet në shtator
Formati i detajuar ende nuk është vulosur përfundimisht. Miratimi pritet në mbledhjen e Komitetit Ekzekutiv të UEFA-s gjatë muajit shtator.
Zbatimi i ndryshimeve është parashikuar pas Europianit 2028. Presidenti i UEFA-s, Aleksander Čeferin, e ka paraqitur reformën si një përpjekje për të rritur vlerën e futbollit të kombëtareve, për të forcuar konkurrencën dhe për të shmangur ndeshjet me peshë të ulët sportive.
Nëse ky format kalon pa ndryshime, futbolli i kombëtareve në Europë do të hyjë në një fazë të re, më të centralizuar dhe më të ngjashme me logjikën tregtare e sportive që UEFA ka imponuar te kompeticionet e klubeve.
Për kombëtaret e vogla, mbetet për t’u parë nëse premtimi për më shumë mundësi është real apo thjesht pjesë e paketimit të zakonshëm të një reforme që favorizon mbi të gjitha produktin e UEFA-s.