Është shpallur projekti fitues i konkursit ndërkombëtar për “Tirana Fountain Tower”, një ndërhyrje e planifikuar pranë Parkut Rinia që, sipas konceptit të paraqitur, synon të ngrejë volumet e ndërtesës mbi nivelin e tokës dhe të lërë sa më shumë hapësirë të lirë për publikun. Projekti vjen me premtimin për të mos i marrë parkut më shumë sipërfaqe në terren, një pretendim që në raste të tilla zakonisht mbetet për t’u parë në zbatim.
Projekti fitues vjen nga studioja daneze BIG
Propozimi fitues është paraqitur nga studioja daneze BIG, Bjarke Ingels Group. Ajo ka propozuar një ndërtesë tridimensionale të ngritur mbi tokë, me volume që, sipas studios, lirojnë sa më shumë sipërfaqen e parkut dhe e mbajnë atë të aksesueshme për qytetarët.
Në thelb, ideja është që funksionet kryesore të ndërtesës të vendosen sipër, ndërsa në nivelin e tokës të krijohen zona të mbuluara, hije dhe hapësira publike që do të shërbenin edhe si një hyrje e re për Parkun Rinia në raport me qytetin.
Koncepti i “resë” dhe premtimi për më shumë hapësirë publike
Koncepti arkitektonik mbështetet te ideja e një “reje”, ku hapësirat për banim dhe punë ngrihen mbi tokë. Sipas prezantimit të studios, kjo qasje synon të shtojë funksione të reja urbane pa zënë më shumë sipërfaqe nga parku.
Studio e ka përshkruar Parkun Rinia si një pikë ku ndërthuren gjelbërimi, uji dhe aktiviteti social, ndërsa projekti i saj përpiqet të lidhet me këtë karakter. Megjithatë, si në çdo ndërhyrje të kësaj natyre në një hapësirë të ndjeshme publike, pesha reale e ndërtimit mbi parkun do të matet jo nga renderat, por nga mënyra se si zbatohet në terren.
Shatërvani dhe uji, të ruajtur por të riformatuar
Projekti parashikon ruajtjen e ujit dhe të shatërvanit si pjesë të identitetit të zonës, por jo në formën ekzistuese. Sipas studios, uji do të ngrihet në strukturë dhe më pas do të rikthehet në park me efektin e një “shiu vere”.
Ky element, sipas autorëve të projektit, synon të ndikojë edhe në mikroklimën lokale dhe në përdorimin e hapësirës publike gjatë muajve të nxehtë. Në praktikë, mbetet për t’u parë se sa funksional dhe i qëndrueshëm do të jetë një model i tillë në raport me mirëmbajtjen dhe përdorimin real të zonës.
Banesa, hoteleri, zyra dhe një komponent kulturor
Sipërfaqet e projektit janë ndarë mes rezidencave, hotelerisë dhe zyrave, çka tregon se bëhet fjalë për një zhvillim me funksione të përziera dhe me peshë të qartë private.
Rreth 10% e programit, sipas projektit, parashikohet për një komponent kulturor dhe funksione të hapura për publikun. Studio synon gjithashtu të krijojë një pikë të re të identifikueshme në qytet, jo përmes lartësisë, por përmes formës dhe lidhjes së ndërtesës me hapësirën publike.
Shpallja e projektit fitues mbyll fazën e konkursit, por jo debatet që zakonisht shoqërojnë ndërhyrjet e mëdha në zemër të Tiranës. Për një zonë si Parku Rinia, pyetja kryesore mbetet e njëjtë: sa hapësirë publike ruhet realisht dhe sa transformohet ajo në funksion të zhvillimit të ri urban.