Një nga udhëtimet më të pazakonta turistike të vitit pritet të nisë më 9 nëntor nga PortMiami drejt Karaibeve. Bëhet fjalë për kroçerën Wonderland, një event për të rritur që, sipas organizatorëve, kombinon luksin e një anijeje gjigante me festa tematike, hapësira intime dhe rregulla të detajuara mbi pëlqimin dhe sjelljen e pasagjerëve.
Mbi 5 800 pasagjerë, të gjithë mbi 21 vjeç
Wonderland do të zhvillohet në bordin e “Wonder of the Seas”, anije luksoze në pronësi të Royal Caribbean. Organizatorët kanë konfirmuar pjesëmarrjen e 5 802 pasagjerëve, me kushtin që të gjithë të jenë mbi moshën 21 vjeç.
Udhëtimi organizohet nga Bliss Cruise dhe paraqitet si një nga grumbullimet më të mëdha të komunitetit të njohur si “lifestyle”, term që përdoret për marrëdhënie jo-monogame me pëlqimin e të gjithë partnerëve, përfshirë shkëmbimin e çifteve dhe marrëdhëniet e hapura.
Ambiente të posaçme për të rritur dhe program shtatëditor
Gjatë shtatë ditëve në det, pasagjerëve u është premtuar një program i veçantë me festa tematike, takime sociale, seminare dhe ambiente të dedikuara për aktivitete intime.
Sipas organizatorëve, solariumi i anijes, me një sipërfaqe prej rreth 3 250 metrash katrorë, si edhe qendra e konferencave, do të përshtaten si zona të posaçme vetëm për të rritur. Në program përfshihen edhe festa me kode të caktuara veshjeje, aktivitete BDSM dhe hapësira ku lejohet nudizmi.
Pëlqimi si kusht bazë, shkelësit mund të zbriten në portin e ardhshëm
Megjithëse koncepti i kroçerës synon një eksperiencë pa formatin tradicional të pushimeve familjare, organizatorët këmbëngulin se nuk bëhet fjalë për mungesë kufijsh. Versioni i tyre zyrtar vendos në qendër pëlqimin e ndërsjellë, detyrimin për të respektuar çdo refuzim dhe zhvillimin e çdo aktiviteti vetëm me miratimin e personave të përfshirë.
Aktivitetet intime lejohen vetëm në kabina private ose në ambientet e përcaktuara posaçërisht, ndërsa nudizmi tolerohet vetëm në zona të caktuara të anijes. Gjatë ndalesave në porte, pasagjerët duhet të respektojnë ligjet lokale. Kush shkel rregullat e organizatorëve rrezikon përjashtimin nga kroçera në portin e ardhshëm.
Kërkesë në rritje dhe çmime që shkojnë mbi 21 mijë dollarë
Sipas CNN, kroçera të këtij lloji po fitojnë terren dhe organizatorët po kalojnë nga anije më të vogla drejt mjeteve turistike gjigante. Për Wonderland, rreth 87 për qind e rezervimeve vijnë nga Shtetet e Bashkuara, ndërsa pjesa tjetër nga Kanadaja dhe vende të tjera.
Në bord pritet të jenë pasagjerë nga 47 kombësi, ndërsa më shumë se gjysma e pjesëmarrësve janë në grupmoshën 45 deri në 59 vjeç. Çmimet e kabinave për rezervimet e bëra në dhjetor 2024 varionin nga 1 630 dollarë për person për kabinat e brendshme deri në mbi 21 mijë dollarë për person për suitën luksoze Royal Loft.
Organizatorët e paraqesin këtë udhëtim si një produkt turistik për të rritur, të mbështetur te respekti, siguria dhe pëlqimi i ndërsjellë. Por vetë struktura e eventit tregon se gjithçka funksionon vetëm mbi një regjim rregullash të forta, kufijsh të qartë dhe kontrolli të vazhdueshëm mbi sjelljen në bord.