Për zgjedhjet vendore të 9 majit 2027 janë vënë në dispozicion 2.5 miliardë lekë, një fond që sipas drejtuesit të KQZ-së, Ilirjan Celibashi, konsiderohet i mjaftueshëm për organizimin e procesit. Por përtej shifrës së buxhetit, debati mbetet te votimi elektronik, ku KQZ pranon se pa marrëveshje politike nuk mund të ketë zgjerim të mëtejshëm.
Fondi për zgjedhjet ndahet nga buxheti i zakonshëm i KQZ-së
Gjatë raportimit në Komisionin për Nismat Qytetare, Bashkëpunimin dhe Mbikëqyrjen Institucionale për projektbuxhetin 2027, Celibashi tha se financimi i zgjedhjeve është dakordësuar me Ministrinë e Financave.
Sipas shifrave të paraqitura, 454.25 milionë lekë janë parashikuar për funksionimin e institucionit të KQZ-së, ndërsa 2.5 miliardë lekët për zgjedhjet janë llogaritur si kontingjencë e veçantë dhe jo si pjesë e buxhetit të zakonshëm institucional.
Sipas versionit të paraqitur nga KQZ, këto fonde pritet të lëvrohen pas hyrjes në fuqi të ligjit për buxhetin dhe pas 1 janarit, pa u parashikuar pengesa në organizimin e procesit.
KQZ pranon kufirin: elektronikja shkon deri në rreth 450 qendra votimi
Në raportim u diskutua edhe votimi dhe numërimi elektronik, një temë që prej vitesh paraqitet si zgjidhje teknike për procesin zgjedhor, por që vazhdon të mbetet e kufizuar.
Celibashi deklaroi se KQZ ka kapacitete që ta realizojë këtë proces në maksimumi rreth 450 qendra votimi. Sipas tij, më pas mbetet për t’u vendosur se ku do të shtrihej konkretisht kjo formë votimi.
Kjo do të thotë se edhe sipas vlerësimit të vetë institucionit, zgjerimi i votimit elektronik nuk është sot një plan i mbyllur, por një mundësi e kushtëzuar si nga kapacitetet teknike, ashtu edhe nga vendimmarrja politike.
Celibashi ia faturon bllokimin mungesës së dakordësisë politike
Kreu i KQZ-së tha se institucioni do të dëshironte një shtrirje më të gjerë të votimit elektronik, por pretendoi se Partia Demokratike nuk është dakord me zgjerimin e numërimit elektronik.
Sipas tij, për sa kohë nuk ka detyrim ligjor dhe nuk ka konsensus mes mazhorancës dhe opozitës, KQZ nuk mund të angazhojë shpenzime të tjera nga buxheti i shtetit për ta çuar më tej procesin.
Në këtë mënyrë, përgjegjësia për vendimin politik u shty sërish te palët parlamentare, ndërsa institucioni zgjedhor mbajti qëndrimin se pa dakordësi nuk do të ndërmarrë hapa shtesë.
Paralajmërimi i KQZ: koha po ngushtohet
Celibashi paralajmëroi se afatet po bëhen problem më vete. Sipas tij, çdo ditë që kalon e vështirëson nga ana teknike realizimin e votimit dhe numërimit elektronik, edhe në rast se më vonë arrihet një marrëveshje politike.
Mesazhi i KQZ-së është i qartë: fondi për zgjedhjet është llogaritur, por për teknologjinë në proces vendimi ende nuk ekziston. Dhe pa një vendim të shpejtë politik, diskutimi për zgjerimin e votimit elektronik rrezikon të mbetet vetëm në nivel deklarativ.
Zgjedhjet e 9 majit 2027 hynë kështu në fazën e planifikimit financiar, por jo në atë të qartësisë politike për mënyrën se si do të votohet.
Për momentin, shifra prej 2.5 miliardë lekësh është e konfirmuar në projektbuxhet, ndërsa votimi elektronik mbetet peng i një konsensusi që, sipas asaj që u tha në Kuvend, ende nuk duket pranë.