Anisa Josifi, 31 vjeç, që u gjet gjysmë e dekompozuar në një prej dhomave të shtëpisë, e mbështjellë me çarçaf, batanije e jorgan në një krevat, mund të ketë vdekur prej në një harku kohor që, sipas mjekëve ligjorë, është nga 6 deri në 12 muaj.
Ndërsa nëna e saj, Zhaneta Josifi, 54 vjeçe, sipas ekspertëve kishte 2-3 ditë e vdekur.
Vajza tjetër, Blerta, që ende nuk ka mbushur 33 vjeçe, duket se e kishte nisur më vonë “agjërimin”, ose i ka mbijetuar më gjatë mosushqyerjes, pasi u gjet nga Policia në gjendje të rëndë.
Ajo tashmë po mbahet në terapi intensive dhe gjendja e saj duket e stabilizuar.
Në shënimet e gjetura në shtëpi, të sekuestruara tashmë nga grupi hetimor, duket se “agjërimi” i tejzgjatur ka qenë i qëllimshëm, në mënyrë që ato të vdisnin dhe më pas të ringjalleshin.
Sigurisht që kjo nuk mund të ndodhte, ashtu siç rezultoi me Anisën, që mbahej e vdekur prej muajsh në shtëpi, duke u lyer me vajra e uthull nga nëna e motra, por tashmë është në morg.
LAJMERIMI
Policia e Tiranës është lajmëruar pasditen e së enjtes nga shtetasi Selman F., se motra e tij që banonte në rrugën “Hamdi Cenoimeri”, në Kombinat, nuk po i përgjigjej në telefon dhe nuk po i hapte derën e banesës.
Ai është pyetur për adresën e saktë dhe drejt tij janë nisur menjëherë shërbimet e Komisariatit Nr.6. Pasi kanë provuar të gjitha format për të hapur derën e apartamentit në katin e tretë të pallatit, shërbimet e Policisë kanë lajmëruar zjarrfikëset, pasi ishte e pamundur që të futeshin brenda.
Në vendngjarje ka mbërritur edhe një automjet zjarrfikës dhe me ndihmën e tyre është arritur të depërtohej në apartament nëpërmjet dritares. Personi që lajmëroi Policinë, është vëllai i kryefamiljares, 54-vjeçares Zhaneta Josifi, e cila u gjet e vdekur. Gjithashtu, u gjet e vdekur, gjysmë e dekompozuar, vajza e saj 31- vjeçare, Anisa Josifi. Ndërsa vajza tjetër, 33-vjeçarja Blerta Josifi, u gjet në gjendje mjaft të rëndë dhe u transportua me urgjencë në spital.
NGJARJA
Policia e Tiranës njoftoi të enjten se mbrapa ish-Mapos në Kombinat, afër shkollës “Myslim Keta”, ka një ngjarje. Nënë e bijë janë gjetur pa jetë në banesë.
Burime zyrtare të Policisë së Tiranës thanë se: “Shtetasi Selman F., ka njoftuar në Komisariatin e Policisë Nr.6, se në rrugën ‘Hamdi Cenoimeri’, motra e tij nuk i përgjigjej në telefon dhe nuk i hapte derën e banesës. Në banesë kanë shkuar shërbimet e Policisë dhe të zjarrfikëses dhe pasi kanë hapur derën, kanë gjetur pa shenja jete shtetasen Zh.J., 54 vjeçe dhe vajzën e saj A.J., 31 vjeçe, ndërsa vajza tjetër B.J., rreth 33 vjeçe, është dërguar në spital, në gjendje të rëndë shëndetësore.
Paraprakisht, nga veprimet e para hetimore dyshohet se janë vetëflijuar. Grupi hetimor i përbërë dhe nga dy ekspertë të Mjekësisë Ligjore ndodhet në vendngjarje dhe po punon për zbardhjen e plotë të rrethanave të ngjarjes”, tha zyrtarisht Policia.