Një incident i rëndë ndodhi gjatë mitingut të Partisë Socialiste në Londër, ku një protestues përfundoi në spital pas një përplasjeje fizike me rojet e sigurisë.
Ilir Meshi, një nga protestuesit që hyri në sallë duke thirrur “Rama ik”, u godit me mjete të forta nga rojet e qeveritarëve. Pas ndërhyrjes së emergjencave mjekësore, Meshi u dërgua në spital për ndihmë të menjëhershme.
Ngjarja vjen mes tensioneve të larta që kanë shoqëruar vizitën e kryeministrit Edi Rama në diasporë, në kuadër të fushatës së tij për zgjedhjet e ardhshme. Protestuesit shprehën pakënaqësinë e tyre ndaj qeverisjes, ndërsa përplasjet brenda sallës nxitën debate mbi menaxhimin e sigurisë në takime të tilla.
Policia britanike ende nuk ka dhënë një reagim zyrtar mbi ngjarjen, ndërsa situata mbetet e nxehtë në radhët e shqiptarëve të diasporës.