Avokati i familjes së Martin Canit, 14-vjeçarit të vrarë pranë shkollës “Fan Noli” në Tiranë, ka reaguar ashpër ndaj deklaratave të deputetit socialist, Erion Braçe. Braçe pretendoi nisjen e hetimeve për dezinformimin që, sipas tij, ka shoqëruar raportimet mediatike për këtë ngjarje tragjike.
Në emisionin “Ora e Betit” në “Ora News”, avokati Redi Ramaj ka akuzuar institucionet shtetërore për dështim total në menaxhimin e rastit dhe për mosinformimin e qytetarëve dhe familjes së viktimës.
“Dështimi fillon nga institucionet,” deklaroi Ramaj, duke shtuar se “familja ka pasur vetëm median si burim informacioni.” Ai kritikoi Policinë e Shtetit për deklarata kontradiktore dhe të paqarta, duke përmendur se numri i personave të përfshirë në konflikt ka ndryshuar disa herë, nga dy në njëmbëdhjetë.
Avokati hodhi dyshime mbi përfshirjen e personave të rritur në konflikt dhe theksoi se dëshmitarët kyç nuk janë marrë në pyetje nga Policia. Për më tepër, ai theksoi se drejtuesit e shkollës nuk kanë reaguar publikisht apo privatisht për t’u solidarizuar me familjen e viktimës.
“Kur flitet për dezinformim, duhet parë së pari Policia e Shtetit dhe institucionet përgjegjëse që nuk e zbardhin ngjarjen,” shtoi Ramaj, duke vënë në dukje mungesën e transparencës në këtë çështje.
Në një kohë kur deputeti Braçe kërkoi hetime për dezinformimin si një veprim të motivuar politikisht, avokati i familjes së Canit sfidoi këtë qëndrim, duke kërkuar që shteti të marrë përgjegjësitë e veta për këtë tragjedi që ka tronditur shoqërinë shqiptare.
“Vrasja e një fëmije pranë një institucioni publik është krimi më i madh që mund t’i ndodhë një shoqërie dhe trauma më e madhe për një familje,” përfundoi avokati.
Ky rast mbetet një thirrje për përgjegjësi të thellë nga institucionet dhe për një qasje të re në mënyrën se si trajtohen ngjarjet tragjike në Shqipëri.