Deputeti i Partisë Demokratike, Luan Baçi, ka dalë në mbështetje të Agron Shehajt pas përplasjes së tensionuar mes këtij të fundit dhe deputetëve të PD-së Flamur Noka, Gazment Bardhi dhe Xhelal Mziu në Kuvend.
Baçi e vlerësoi lëvizjen e Shehajt për të kërkuar interpelancë me ministren Belinda Balluku, duke e cilësuar atë si një akt të mirëfilltë opozitar:
“Shumë mirë bëri Shehaj që kërkoi interpelancë me Ballukun. Kjo ishte opozitë. Ai bën opozitë në mënyrën e tij,” u shpreh Baçi në një intervistë për News24.
Ai theksoi se në opozitë ka gjithnjë individë me qasje dhe mënyra të ndryshme për të vepruar, por shtoi se askujt nuk mund t’i imponohet një axhendë e vetme.
Përçarje në radhët e PD-së
Nga ana tjetër, Flamur Noka vijoi sulmet ndaj Shehajt, duke aluduar për lidhje të tij me Erion Veliajn dhe Ëngjëll Agaçin. Ndërkohë, edhe Sali Berisha kritikoi sjelljen e Shehajt në Kuvend, por e cilësoi atë si një figurë opozitare të vlefshme.
Kjo përplasje tregon tensionet e brendshme në Partinë Demokratike, ku qasjet e ndryshme për të bërë opozitë vijojnë të jenë burim përçarjesh dhe debatesh publike. Megjithatë, mbështetja e Baçit ndaj Shehajt nxjerr në pah një përpjekje për të ruajtur unitetin dhe për të inkurajuar diversitetin e qasjeve brenda kampit opozitar.