Papa Françesku, në hapjen e Derës së Shenjtë në Bazilikën e Shën Pjetrit, përcolli një mesazh të fuqishëm për fillimin e Vitit të Shenjtë 2025. Ai e quajti këtë periudhë si një thirrje për shpresë dhe ripërtëritje shpirtërore, duke ftuar botën të reagojë kundër padrejtësive dhe vuajtjeve.
Një thirrje për veprim
Sipas Atit të Shenjtë, të gjithë kanë një përgjegjësi për të sjellë shpresë në botën e plagosur. Ai vuri theksin në vendet e shkatërruara nga lufta, në jetët e të varfërve dhe në zemrat e atyre që vuajnë në heshtje.
“Shpresa nuk toleron përtacinë dhe dembelizmin,” theksoi Papa, duke u kërkuar njerëzve të largohen nga komoditetet personale dhe të angazhohen për të luftuar padrejtësitë e kryera ndaj më të dobëtëve.
Jubileu dhe mesazhi i faljes
Papa lidhi hapjen e Derës së Shenjtë me një mesazh faljeje dhe shprese. Ai theksoi se, pavarësisht kushteve të vështira, shpresa mbetet një dhuratë hyjnore që ndriçon jetën edhe në errësirën më të thellë.
“Edhe kur zemrat tona janë të varfra si një grazhd, shpresa mbetet e gjallë dhe ndriçon jetën tonë përgjithmonë,” tha ai.
Mesazhi për Krishtlindje
Papa Françesku e përmbylli fjalimin e tij duke theksuar rëndësinë e solidaritetit dhe angazhimit për një botë më të drejtë. Ai kërkoi nga njerëzit të ndjekin shembullin e barinjve në Krishtlindjen biblike, të cilët ndoqën pa vonesë thirrjen për t’u afruar më shumë me Zotin.
Kjo periudhë e shenjtë, sipas tij, është një mundësi për të rizbuluar gëzimin dhe shpresën, duke e kthyer atë në veprime konkrete për një botë më të mirë dhe më humane.