Kryeministri Edi Rama ka mbajtur një fjalim të fortë para shqiptarëve në Athinë, ku theksoi qëndrimin e qeverisë shqiptare për barazinë dhe respektin në marrëdhëniet ndërkombëtare.
“Puna jonë është një mision. Ajo që nuk do harrohet kurrë dhe do shënjohet në histori është që ne ngritëm për herë të dytë flamurin kombëtar, atje ku na kanë parë nga lart-poshtë”, u shpreh Rama, duke nënvizuar përparimin e Shqipërisë në arenën ndërkombëtare.
Ai theksoi se Shqipëria nuk do të pranojë trajtim të pabarabartë në marrëdhëniet me fqinjët. “E kanë kuptuar që e kemi seriozisht dhe me ne ka një kusht që nuk e negociojmë: japim respekt dhe duam respekt. Ndryshe, me ne nuk mund të shkohet më tutje”, theksoi kryeministri.
Rama theksoi gjithashtu se përpjekjet e Shqipërisë për anëtarësim në Bashkimin Evropian po ecin përpara dhe se vendi synon të bëhet një anëtar i barabartë në familjen evropiane. “Na duhet flamuri atje dhe t’i vëmë vulën kësaj historie me marrjen e statusit si anëtar i BE-së”, përfundoi ai.
Një mesazh i qartë për marrëdhëniet me Greqinë
Deklaratat e Ramës vijnë në një kohë kur marrëdhëniet mes Shqipërisë dhe Greqisë kanë qenë të tensionuara për çështje të ndryshme, përfshirë të drejtat e emigrantëve shqiptarë në Greqi dhe negociatat për kufirin detar. Qëndrimi i tij i prerë sinjalizon një politikë më të vendosur për të mbrojtur interesat e shqiptarëve jashtë vendit.