Zlatan Ibrahimovic, këshilltari i lartë i Milanit, ka zgjedhur Igli Taren si kandidatin e tij të parë për postin e drejtorit sportiv, në një moment kyç për të ardhmen e klubit kuqezi. Sipas Corriere dello Sport dhe burimeve të tjera italiane, Tare është alternativa më e favorshme për Ibrahimovic, edhe pse drejtuesit e klubit vazhdojnë të shqyrtojnë një listë më të gjerë kandidatësh.
Kush është Igli Tare?
Igli Tare, ish-drejtues i suksesshëm i Lazios për 15 vite nën presidentin Claudio Lotito, ka mbetur pa angazhim që prej dy vitesh, çka e bën atë një kandidat të lirë nga çdo kontratë ekzistuese — për rrjedhojë, Milani nuk do të paguajë asnjë dëmshpërblim për emërimin e tij.
Kandidatët e tjerë
Përveç Tares, në listë janë edhe:
- Tony D’Amico, drejtori aktual sportiv i Atalantës, preferuar nga CEO i Milanit, Giorgio Furlani.
- Giovanni Manna, aktualisht nën kontratë me Napolin deri në vitin 2029.
Megjithatë, këta të fundit nuk mund të nisin punën përpara përfundimit të sezonit, ndryshe nga Tare, që mund të nisë detyrën menjëherë.
Një vendim strategjik
Pas tërheqjes së Fabio Paraticit për arsye ligjore, Ibrahimovic ka intensifikuar përpjekjet për të siguruar një drejtues me përvojë në merkato dhe me vizion për të rindërtuar një Milan konkurrues në Itali dhe Europë.
Tare ka përvojë të gjatë në Serie A, është njohës i thellë i tregut të futbollit dhe ka reputacion për zbulimin e talenteve, faktorë që mund ta bëjnë atë një lëvizje të goditur për klubin.