Gjykata e Posaçme e Apelit për Korrupsionin dhe Krimin e Organizuar ka lënë në fuqi masën e arrestit me burg për Zambak Gjonin dhe Arnold Rrokajn, të dyshuar për sulmin kibernetik ndaj sistemit të SPAK, përmes ndërhyrjes në emailet e tre prokurorëve të posaçëm, përfshirë edhe tentativën për të hyrë në postën elektronike të Altin Dumanit.
Ngjarja ndodhi më 12 mars 2025, ndërsa të dy të dyshuarit u arrestuan brenda 48 orëve, pas ndërhyrjes së shpejtë të BKH-së dhe prokurorit Bledar Maksuti. Sipas njoftimit zyrtar të SPAK, megjithëse sistemi i brendshëm nuk është komprometuar, janë marrë të dhëna nga emailet, të cilat më pas janë shpërndarë në rrjet nga persona të tretë.
Arnold Rrokaj, 33 vjeç nga Vlora, ish-punonjës në IMT, ka pranuar se ka ndërhyrë në emaile, fillimisht “nga kurioziteti”, por më pas ka kaluar dokumentet te Zambak Gjoni, jurist dhe ish-zyrtar i burgjeve. Hetuesit dyshojnë se kemi të bëjmë me strukturë kriminale të organizuar, që ka shpërndarë dosje konfidenciale te dy gazetarë dhe dy zyrtarë të tjerë, aktualë apo ish-zyrtarë.
Gjykatësi Dhimitër Lara miratoi sot ankimin për masë sigurie, duke konfirmuar se të arrestuarit do të qëndrojnë në burg, ndërkohë që hetimet për rrjedhje të mundshme informacioni konfidencial vijojnë.
SPAK ka urdhëruar mospublikimin e materialeve të përftuara, teksa pritet të zbulohet se cilat dosje janë prekur dhe kush janë personat përfitues të këtyre të dhënave. Ka dyshime se fjalëkalimet e përdorura nga prokurorët kanë qenë të lehta, duke e bërë të mundur thyerjen e llogarive elektronike.
Çfarë ndodhi me sulmin ndaj SPAK?
Më 12 mars, u hakuan emailet e tre prokurorëve të posaçëm. Brenda 48 orëve u arrestuan dy persona që dyshohet se shpërndanë dokumentet e përftuara.
A janë prekur dosjet hetimore?
Sipas SPAK, nuk ka rrjedhje të dosjeve nga sistemi i brendshëm, por po hetohet për dokumente që janë marrë nga postat elektronike.
Kush janë të arrestuarit?
Arnold Rrokaj dhe Zambak Gjoni. I pari ka pranuar ndërhyrjen, i dyti akuzohet për shpërndarjen e të dhënave.
A është përfshirë ndonjë figurë publike në marrjen e këtyre dokumenteve?
SPAK po heton për dy gazetarë dhe dy zyrtarë që mund të kenë pasur kontakt me materialet e shpërndara.