Gjatë një fjalimi të mbajtur në zonën e Astirit në Tiranë, kryetari i Partisë Demokratike, Sali Berisha, ka deklaruar se çështja e inceneratorit të Tiranës dhe skandali McGonigal kanë tronditur liderët europianë. Ai tha se gjatë vizitës në Valencia, ku mori pjesë në Kongresin e Partisë Popullore Europiane, kryeministrat e vendeve europiane shfaqën habi të papërmbajtur për rastin e djegësit dhe ndanë bindjen se Edi Rama do ndjekë McGonigalin nga pas.
“Kur tregoja për djegësin e Tiranës, më shikonin të shokuar. E përsëritja se një skandal i tillë nuk përshkruhet. Kur u tregova për McGonigalin, ata thoshin: ‘Rama do përfundojë pas tij’, sepse edhe vetë McGonigal i tha: ‘Paratë m’i dhe ti’,” – deklaroi Berisha.
Në të njëjtën fjalë, ai paraqiti prioritetet e qeverisjes së ardhshme të PD-së:
- Rroga minimale 500 euro
- Rroga mesatare 1250 euro
- Pension minimal jetik 200 euro për çdo qytetar
- Pagë për mësuesit minimumi 1500 euro
- Heqja e turneve në shkolla dhe dixhitalizim total i sistemit arsimor
Berisha theksoi se shkaku kryesor i largimit të mbi 1 milion shqiptarëve nga vendi në dekadën e fundit është varfëria dhe papunësia, ndërsa statistikat zyrtare sipas tij tregojnë se eksportet shqiptare ranë me 32% nga 2023 në 2024, duke çuar në humbjen e dhjetëra mijëra vendeve pune.
“Rama tallet me shqiptarët, kur thotë se është ulur papunësia. Në fakt, shqiptarët po punësohen në Greqi, Itali e Gjermani. Në Shqipëri, shkatërrohen vendet e punës,” – tha Berisha.
Ai përmbylli fjalën duke i bërë thirrje qytetarëve të votojnë për ndryshimin më 11 maj, duke theksuar se PD do të vendosë Shqipërinë në krye të rajonit për paga dhe pensione dhe se kombit shqiptar i duhet një qeveri që e çon përpara, jo që e zhyt në krim dhe varfëri.