Çmimet e naftës ranë ndjeshëm të mërkurën, teksa raportet nga Arabia Saudite ngrenë alarmin për një tjetër lëvizje agresive në tregun global të energjisë. Nafta Brent po tregtohej me 60.02 dollarë për fuçi, ndërsa WTI ra në 57.10 dollarë, duke shënuar një rënie përkatësisht me -1.70% dhe -1.91%.
Sipas burimeve të Reuters dhe Bloomberg, Arabia Saudite është e gatshme jo vetëm të tolerojë çmimet e ulëta të naftës, por edhe të rrisë prodhimin duke filluar nga qershori. Në vend që të aplikojë ulje të mëtejshme në furnizim për të mbështetur çmimet, Rijadi po sinjalizon një rritje të mundshme të prodhimit, duke i dhënë fund rolit të saj si “prodhuesi rregullues” brenda OPEC+.
Burime të afërta me qeverinë saudite kanë deklaruar për Reuters se buxheti i Mbretërisë mund të përballojë çmime të ulëta për një periudhë të gjatë, dhe në vend që të përpiqet të mbrojë çmimin, objektivi është rikthimi i pjesës së tregut të humbur për shkak të kufizimeve të prodhimit.
OPEC+ paralajmëroi më herët këtë muaj një rritje prej 411,000 fuçish në ditë për muajin maj, duke përshpejtuar eliminimin e shkallëzuar të kufizimeve vullnetare të prodhimit. Ky ishte një sinjal i parë se Arabia Saudite mund të mos jetë më e gatshme të “ndëshkohet” për shkeljet e kuotave nga anëtarë të tjerë si Kazakistani, Emiratet e Bashkuara dhe Iraku.
Ekspertët e Bloomberg theksojnë edhe një dimension gjeopolitik: Arabia Saudite po tenton të kënaqë Uashingtonin, i cili ka ushtruar presion që OPEC të shtojë prodhimin për të ulur kostot e karburantit në SHBA përpara fushatës presidenciale të vitit 2026.
Sipas Bob McNally, president i Rapidan Energy dhe ish-zyrtar i Shtëpisë së Bardhë, kur udhëheqësia e OPEC+ nxit për zbatim të rreptë përmes presionit të furnizimit, nuk ndalet derisa të arrijë qëllimin.
Në përfundim, tregjet po përgatiten për një tjetër përplasje mes gjigantëve të naftës. Nëse Arabia Saudite çon përpara planin për të rritur prodhimin në mënyrë agresive, atëherë çmimet mund të bien më tej dhe të trondisin prodhuesit e vegjël, veçanërisht ata në SHBA, ku kostoja e prodhimit mbetet shumë më e lartë.