Momente paniku janë regjistruar në qytetin e Liverpoolit gjatë festimeve për titullin kampion të Premier Ligës. Një makinë është futur mes turmës së tifozëve, duke shkaktuar skena të frikshme dhe plagosje të lehta mes njerëzve të pranishëm.
Ngjarja ndodhi në kulmin e paradës së festimeve, ku qindra tifozë kishin dalë për të përshëndetur ekipin që riktheu titullin në qytet pas 5 viteve pritje. Incidenti u bë menjëherë viral, ndërsa policia ka arrestuar drejtuesin e mjetit dhe ka nisur hetimet për të zbardhur motivet e sulmit.
Tifozët e shokuar, pamjet shpërthejnë në rrjet
Në videot që qarkullojnë online, shihen qartë momentet kur automjeti përshkon turmën e dendur të tifozëve, duke nxitur reagime të forta dhe panik. Shërbimet mjekësore mbërritën me urgjencë në vendin e ngjarjes për të ndihmuar të lënduarit, ndërsa forcat e policisë e izoluan zonën.
Liverpooli feston titullin e 20-të të Premier Ligës
Pavarësisht incidentit, festa e titullit të fituar nga skuadra e drejtuar nga Arne Slot vazhdoi më tej. Ky është trofeu i 20-të i Liverpoolit në kampionatin anglez, duke e vendosur klubin sërish mes më të suksesshmëve në historinë e futbollit anglez.
Ngjarja e frikshme ka rikthyer debatet për sigurinë në tubime masive, ndërsa autoritetet britanike pritet të publikojnë së shpejti një raport zyrtar mbi rrethanat e incidentit që rrezikoi të kthente një ditë festimi në tragjedi.