Ministri rus i Transportit, Roman Starovoit, është gjetur i vdekur pranë Moskës vetëm disa orë pasi Presidenti Vladimir Putin e shkarkoi nga detyra. Sipas mediave ruse, ai dyshohet se ka ndërruar jetë në rrethana që ngjajnë me vetëvrasje, ndërsa pranë trupit të tij është gjetur një armë zjarri.
Shkarkimi i papritur i ministrit Starovoit ndodhi pas një fundjave të trazuar në aviacionin civil rus, ku afro 300 fluturime u anuluan në aeroportet kryesore të vendit për shkak të sulmeve me dronë ukrainas që goditën infrastrukturën ajrore. Ky paralizim masiv i qarkullimit ajror besohet të ketë shkaktuar tronditje në Kremlinin e përfshirë nga tensionet e luftës dhe pasojat politike të saj.
Kremlini nuk ofroi asnjë arsyetim zyrtar për shkarkimin, dhe as për ndonjë hetim disiplinor ose penal ndaj Starovoit. Ai ishte emëruar ministër i Transportit në maj të vitit 2024, pas një periudhe të gjatë si guvernator i rajonit të Kurskut.
Raportimet mbi vetëvrasjen janë ende të pakonfirmuara zyrtarisht, ndërsa autoritetet ruse nuk kanë dhënë detaje rreth rrethanave të vdekjes. Mungesa e transparencës ka shtuar dyshimet për një vdekje të dyshimtë, sidomos në klimën e mbyllur dhe të tensionuar politike që karakterizon regjimin e Putinit.
Ngjarja ka shkaktuar jehonë të menjëhershme ndërkombëtare, duke shtuar një tjetër emër në listën e zyrtarëve të lartë rusë që humbasin jetën papritur në rrethana misterioze. Që nga fillimi i luftës në Ukrainë, disa figura të njohura të biznesit dhe politikës në Rusi janë gjetur të vdekur në rrethana që shpesh raportohen si vetëvrasje, por që ngjallin dyshime për eliminime të mundshme të urdhëruara nga lart.
Analistët politikë vlerësojnë se kjo ngjarje mund të përshkallëzojë krizat e brendshme të Putinit, ndërsa lufta në Ukrainë vazhdon të godasë strukturat ushtarake dhe institucionale të Rusisë. Starovoit mund të jetë bërë kokë turku për një dështim operacional, por misteri i vdekjes së tij mund të kthehet në një tjetër peshë për imazhin e Kremlinit në sytë e opinionit publik ndërkombëtar.