Policia e Kantonit të Cyrihut arrestoi reperin shqiptar Noizy në aeroport të shtunën, duke vepruar për llogari të Zyrës së Prokurorit Publik për Krime të Rënda të Dhunshme. Në njoftimin zyrtar, nuk u dhanë detaje konkrete mbi veprat penale që i atribuohen reperit 38-vjeçar, për shkak të ndjeshmërisë dhe vazhdimësisë së procedurave hetimore.
Sipas medias zvicerane watson.ch, ndaj Noizyt janë ngritur akuza të shumta dhe prokuroria ka kërkuar vendosjen e masës së paraburgimit. Megjithatë, një vendim përfundimtar nga gjykata ende nuk është dhënë. Autoritetet kanë konfirmuar se parimi i prezumimit të pafajësisë mbetet në fuqi deri në shpalljen e një vendimi përfundimtar.
Reperi shqiptar kishte planifikuar të performonte në klubin “Rinora 4” në Rümlang dhe të promovonte albumin e tij të ri, por arrestimi në Aeroportin e Cyrihut e ndërpreu çdo plan. Aktiviteti muzikor u anulua menjëherë dhe njoftimet për koncertin u fshinë nga rrjetet sociale.
Watson.ch vë në dukje lidhjet e Noizyt me politikën shqiptare, duke përmendur se gjatë fushatës elektorale dhe pas rizgjedhjes së Edi Ramës, reperi ka performuar me të në skenë. Kjo e ka bërë atë një figurë të afërt me pushtetin në Tiranë.
Noizy numëron mbi 4 milionë ndjekës në Spotify dhe më shumë se 2 milionë ndjekës në Instagram, duke e bërë një nga emrat më të fuqishëm të skenës muzikore shqiptare. Megjithatë, që nga e shtuna ai ndodhet në një situatë ligjore serioze në Zvicër dhe përballja me drejtësinë zvicerane pritet të zbulojë më shumë mbi akuzat që rëndojnë ndaj tij.