Një tjetër pjesë tronditëse i shtohet dosjes që po hetohet nga SPAK lidhur me aferën e tenderave të Komisionit të Prokurimit Publik. Lindita Skeja, zyrtarja që del në përgjime në dosjen e Jonaid Myzyrit, ka dëshmuar para prokurorëve se është viktimë e një grabitjeje të armatosur në banesën e saj në Librazhd, ku sipas saj, janë marrë 200 mijë euro dhe paund, si dhe është marrë peng vëllai i saj.
Grabitje nën kërcënimin e armës
Ngjarja ka ndodhur në praninë e tre fëmijëve të mitur, nënës së saj dhe vëllait. Në dëshminë e saj përpara SPAK, Lindita Skeja ka pohuar:
“Po, është e vërtetë. Kanë hyrë katër persona të maskuar. Ishim në shtëpi – unë, mamaja, vëllai dhe fëmijët e mi. Na terrorizuan. Njëri na rrinte me armë te koka, të tjerët kontrolluan shtëpinë derisa gjetën lekët. Pastaj morën peng vëllanë dhe e lanë në Labinot që të mos denonconte.”
Sipas saj, vëllai ka ecur më këmbë për orë të tëra derisa ka arritur të kërkojë ndihmë. Ngjarja është denoncuar në policinë e Librazhdit, por tani po hetohet si pjesë e një hetimi më të gjerë, që përfshin edhe dyshime për pasuri të fshehur dhe aktivitet kriminal të organizuar.
SPAK verifikon origjinën e ngjarjes dhe lidhjet me dosjen Myzyri
Zyrtarja e KPP-së del edhe në përgjimet që implikojnë kreun e pezulluar të Komisionit, Jonaid Myzyri, në një skemë të dyshuar manipulimi tenderash me vlerë miliona euro. SPAK ka kërkuar nga policia e Elbasanit dhe Librazhdit konfirmim nëse grabitja dhe pengmarrja janë raportuar që në vitin 2020, siç përmendet në bisedat e përgjuara të dosjes penale.
Kjo dëshmi jo vetëm që e ndërlidh personalisht Lindita Skejën me një sasi të madhe parash të pakonfirmuara ligjërisht, por gjithashtu ngre pikëpyetje serioze mbi origjinën e kësaj pasurie dhe lidhjen e saj me skemat e abuzimit me tendera publikë.
Një hallkë tjetër në zinxhirin e korrupsionit institucional?
Rrëfimi për grabitjen nuk mund të trajtohet i izoluar. Fakti që zyrtarja që pranon të ketë firmosur “si dele” në dokumente tenderash është njëkohësisht person që mban në banesë shuma të mëdha parash në valutë të huaj, forcon dyshimet se prapaskena e korrupsionit në KPP është më e thellë se thjesht shpërdorim detyre.
Hetimi ndaj Jonaid Myzyrit dhe bashkëpunëtorëve të tij ka marrë dimensione të reja, ku po analizohen të gjitha rrjedhat financiare, përfshirë edhe episode kriminale që deri më tani kishin kaluar pa vëmendje publike. Grabitja në Librazhd nuk është thjesht një krim ordiner – është një skenë që ndoshta përpiqej të mbulonte një krim më të madh: korrupsionin e strukturuar institucional.
Ngjarja e Librazhdit dhe dëshmia e Lindita Skejës janë një thirrje urgjente për transparencë dhe hetim të plotë nga SPAK, jo vetëm për prishjen e barazisë në tendera, por edhe për burimet e jashtëligjshme të pasurimit që po dalin në dritë me zhvillimet më të fundit të kësaj dosjeje.