Forcat siriane po përgatiten të rikthehen në qytetin Suveida, i banuar nga pakica fetare druze, pavarësisht paralajmërimeve të ashpra nga Izraeli, duke vënë në rrezik një armëpushim të brishtë në jug të vendit. Këtë e bëri të ditur një zëdhënës i Ministrisë së Brendshme të Sirisë.
Përplasjet disaditore mes fisëve beduinë dhe luftëtarëve druzë u ndërprenë përkohësisht të mërkurën pas shpalljes së një armëpushimi, por situata mbetet e tensionuar. Në përpjekje për të ndalur gjakderdhjen, Qeveria siriane kishte dërguar trupa shtesë në rajon, veprim që u përshkallëzua në përplasje direkte me Izraelin.
Izraeli, duke e konsideruar qeverinë islamiste të Sirisë si kërcënim, goditi me sulme ajrore forcat siriane në Suveida, si dhe objektiva kyçe në Damask, përfshirë edhe Ministrinë e Mbrojtjes dhe afër Pallatit Presidencial. Sulmet izraelite vijuan edhe gjatë natës, duke dëmtuar ndjeshëm pozicionet siriane në jug.
Përballë kësaj ndërhyrjeje, trupat siriane u tërhoqën përkohësisht nga qyteti, por përleshjet mes beduinëve dhe druzëve rifilluan të enjten në mbrëmje, duke bërë që ushtria të shqyrtojë një rikthim të menjëhershëm për të rimarrë kontrollin.
Izraeli është shprehur i vendosur për të mbrojtur pakicën druze në Siri, duke reaguar si pasojë edhe e presionit nga komuniteti druz në vetë Izraelin. Ushtria izraelite e cilësoi udhëheqjen aktuale të Sirisë si një rrezik të maskuar nën petkun e islamizmit radikal.
Ndërkohë, qëndrimi amerikan është dukshëm më i matur. SHBA-ja, e cila ndërhyri për të ndërmjetësuar armëpushimin e fundit, u shpreh se nuk e mbështet ndërhyrjen e drejtpërdrejtë izraelite. Shtëpia e Bardhë tha të enjten se armëpushimi ishte në zbatim, por situata mbetet shumë e paqëndrueshme.
Presidenti i përkohshëm sirian, Ahmed al-Sharaa, një figurë që ka kërkuar afrimin me SHBA-në, akuzoi Izraelin për përpjekje për destabilizim dhe përçarje të vendit, duke deklaruar se “Siria do të mbrojë me çdo kusht pakicën druze.”
Situata në jug të Sirisë mbetet në prag shpërthimi. Nëse forcat siriane do të përpiqen të rikthejnë kontrollin në Suveida, përballë vendosmërisë së Izraelit për të ndërhyrë ushtarakisht, rreziku për një konflikt të hapur ndërkombëtar rritet ndjeshëm.