Pas pretendimit tronditës se Presidenti aktual i SHBA-së, Donald Trump, i kishte dërguar një letër me përmbajtje seksuale Jeffrey Epstein-it, gazeta prestigjioze Wall Street Journal ka zbuluar një tjetër fakt shqetësues: edhe ish-presidenti Bill Clinton i ka shkruar një mesazh për ditëlindjen e 50-të të pedofilit të dënuar.
Në vitin 2003, për ditëlindjen e tij, Jeffrey Epstein mori një dhuratë të veçantë – një libër të personalizuar me mesazhe të firmosura nga njerëzit më të afërt. Kjo nismë ishte ndërmarrë nga partnerja e tij, Ghislaine Maxwell, e cila u dënua në vitin 2022 me 20 vite burg për rolin e saj në rrjetin e trafikimit seksual. Brenda këtij libri, sipas WSJ, ndodhej një mesazh nga Trump me skicën e një gruaje të zhveshur dhe nën të, firma e presidentit e pozicionuar në mënyrë provokuese, duke aluduar në një qime pubike.
Ky zbulim shkaktoi një stuhi reagimesh në Shtëpinë e Bardhë, me Trump që paditi menjëherë Wall Street Journal dhe pronarin Rupert Murdoch për shpifje.
Por tani, po e njëjta gazetë raporton se edhe Bill Clinton ka lënë gjurmën e tij në këtë dhuratë për Epstein. Ish-presidenti ka shkruar:
“Është qetësuese, apo jo, të kesh zgjatur kaq gjatë, gjatë gjithë këtyre viteve të të mësuarit dhe njohurive, aventurave dhe [fjalë e palexueshme], dhe gjithashtu të kesh ruajtur kuriozitetin tënd fëmijëror, dëshirën tënde për të bërë një ndryshim dhe rehatinë e miqve të tu.”
Ky mesazh është gjetur në seksionin “Miqtë” të librit të dhuratës, ku ishin përfshirë edhe emra të tjerë të fuqishëm si: miliarderi Leon Black, ekzekutivi i medias Mortimer Zuckerman, ish-drejtuesi i Victoria’s Secret, Leslie Wexner dhe drejtori i agjencisë franceze të modelimit, Jean-Luc Brunel.
Ky nuk është kontakti i parë i dokumentuar midis Clinton dhe Epstein. Në janar 2024, një gjykatës në Nju Jork publikoi një listë me 150–180 emra të lidhur me Epstein-in – përfshirë edhe Bill Clinton dhe Donald Trump – por pa ndonjë akuzë të drejtpërdrejtë penale për ta.
Pas vetëvrasjes së Epstein në burg në vitin 2019, një tjetër skandal shpërtheu: në shtëpinë e tij në Manhattan u gjet një pikturë ku paraqitej Bill Clinton i veshur me një fustan blu dhe taka të kuqe, i ulur provokueshëm në Zyrën Ovale. Kjo veshje u interpretua si një nënkuptim për aferën e tij me Monica Lewinsky.
Një zëdhënës i Clinton ka pranuar se ish-presidenti ka udhëtuar katër herë me avionin privat të Epstein, por ka mohuar çdo dijeni mbi aktivitetet kriminale të financierit amerikan.