Kryetari i Partisë Demokratike, Sali Berisha, u paraqit këtë të diel në SPAK për të zbatuar masën e sigurisë “detyrim paraqitje”, ndërsa pas daljes dha një deklaratë të ashpër për mediat. Ai akuzoi Prokurorinë e Posaçme dhe Gjykatën Kushtetuese për veprime që, sipas tij, cenojnë themelet e drejtësisë dhe shtetit ligjor në vend.
“Arrestimi i avokatit është terror ndaj drejtësisë”
Berisha e quajti arrestimin e avokatit Ulian Bajrami “një akt terrori institucional”, që synon t’u mbyllë gojën avokatëve në sallën e gjyqit.
“Arrestojnë avokatin në Elbasan sepse guxoi t’i thotë prokurorit se do të bëjë padi penale. Të arrestosh avokatin për një debat në sallë është terror mbi drejtësinë. Kjo është përpjekje për t’u mbyllur gojën mbrojtësve të ligjit,” – deklaroi ai.
Ish-kryeministri tha se kishte parë vetë regjistrimet e seancës, duke shtuar se “ky është turpi më i madh për drejtësinë shqiptare”. Sipas tij, SPAK po përpiqet të shndërrojë “krimet e veta të shëmtuara në mburojë për drejtësinë”.
Akuza ndaj Gjykatës Kushtetuese
Berisha iu referua më pas çështjes së mandatit të gjyqtares Sonila Bejtja, duke e cilësuar si “akt flagrant antikushtetues”.
“Gjykata Kushtetuese ka shkelur Kushtetutën dhe ligjin. Nuk ndodh askund që gjykata të gjykojë vetë mbi mandatin e një anëtari të saj. Ky është konflikt interesi i pastër,” – theksoi ai.
Sipas tij, Bejtja ka filluar mandatin në vitin 2020 dhe çdo vendim mbi vlefshmërinë e tij duhej të ishte kompetencë e Parlamentit, jo e vetë gjykatës.
“Nuk është Presidenti që i drejtohet Kushtetueses me letër. Nëse donte zgjidhje, duhej t’i drejtohej Parlamentit. Kjo që ndodhi është një turp institucional,” – shtoi Berisha.
Një drejtësi e kapur?
Në fund të deklaratës, Berisha u shpreh se drejtësia e re “është kapur politikisht dhe po përdoret si armë kundër opozitës”.
Ai paralajmëroi se opozita do të vazhdojë të denoncojë çdo rast të abuzimit institucional, duke e cilësuar “arrestimin e avokatit si një provë të qartë të klimës së frikës që po instalohet në sallat e gjykatave”.