Gjykata e Posaçme e Apelit për Korrupsionin dhe Krimin e Organizuar (GJKKO) ka rrëzuar ankimimin e ish-presidentit Ilir Meta për ndryshimin e masës së sigurisë, duke lënë në fuqi vendimin e mëparshëm për “arrest në burg”.
Apeli i GJKKO lë në fuqi vendimin
Vendimi i Apelit erdhi vetëm një ditë pasi GJKKO e shkallës së parë rrëzoi kërkesën e Metës për shuarjen e masës së sigurisë, duke i hapur rrugë qëndrimit të tij të mëtejshëm në qeli.
Meta ndodhet në burg që prej tetorit të vitit 2024, i akuzuar nga SPAK për korrupsion pasiv, pastrim parash dhe fshehje pasurie.
Hetimet përfshijnë tri çështje të bujshme: aferën CEZ-DIA, lobimin e LSI-së në SHBA dhe pasuritë e padeklaruara të tij dhe familjes.
Argumentet e mbrojtjes
Avokati i Metës, Kujtim Cakrani, e cilësoi vendimin si të padrejtë dhe të rrezikshëm për drejtësinë, duke argumentuar se janë tejkaluar afatet ligjore të qëndrimit në paraburgim dhe se nuk ekziston asnjë rrezik për ndikim në prova apo pengim të hetimeve.
Sipas tij, gjykata po mban një qëndrim të njëanshëm ndaj ish-presidentit, duke e trajtuar ndryshe nga raste të tjera të ngjashme.
“Në rastin e zotit Meta janë ezauruar të gjitha afatet për paraburgim. Çdo masë sigurie në këtë fazë është e pajustifikuar dhe politike,” deklaroi Cakrani.
Akuza ndaj sistemit të drejtësisë
Mbrojtja akuzoi gjithashtu sistemin gjyqësor për mungesë vendimesh pafajësie, duke thënë se “sallat e gjyqeve janë kthyer në toga pushkatimi”.
Avokati paralajmëroi se do të vijojnë betejën ligjore në instanca më të larta, duke përfshirë edhe Gjykatën Kushtetuese dhe Gjykatën Evropiane të të Drejtave të Njeriut (GJEDNJ) nëse është e nevojshme.
Një vit pas arrestimit
Kjo është herë e dytë që Apeli i GJKKO refuzon kërkesën e Ilir Metës për liri. Dosja e tij u dërgua për gjykim në fund të gushtit 2025, ndërsa procesi gjyqësor pritet të nisë brenda këtij viti.
Vendimi për të mbajtur në fuqi masën e arrestit konsiderohet një goditje e rëndë për mbrojtjen, e cila kishte shpresuar se pas një viti në qeli, ish-presidenti do të mund të priste gjykimin në arrest shtëpie ose nën detyrim paraqitjeje.