Një tërmet me magnitudë 6.1 të shkallës Rihter tronditi mbrëmjen e së hënës qytetin Sındırgı të Balıkesirit, në Turqi, duke u ndjerë gjerësisht edhe në Stamboll, Izmir, Manisa dhe disa provinca të tjera të vendit.
Sipas AFAD-it (Drejtoria e Menaxhimit të Fatkeqësive dhe Emergjencave), lëkundja kryesore u regjistrua në orën 22:48 me thellësi të moderuar, ndërsa pas saj janë shënuar disa pasgoditje me magnituda që varionin nga 3.5 deri në 4.2.
Ministri Yerlikaya: “Nuk ka viktima, vetëm dëme materiale”
Ministri i Brendshëm Ali Yerlikaya njoftoi në një lidhje për CNN Türk se deri më tani nuk raportohet për viktima, por janë shënuar dëme në tre ndërtesa dhe një dyqan në zonën e Sındırgı.
“Dy ndërtesa dhe një dyqan janë shembur, por ishin të pabanueshme që më parë. Nuk ka humbje jete, vetëm disa raste të lehta lëndimi nga paniku dhe persona që kanë kërcyer nga ballkonet,” – deklaroi ai, duke shtuar se autoritetet janë në terren për verifikim.
Shkollat mbyllen për një ditë
Prefektura e Balıkesirit njoftoi se për shkak të tronditjeve, mësimi do të pezullohet për një ditë në të gjitha shkollat e provincës. Ndërkohë, punonjësit shtetërorë shtatzënë dhe personat me aftësi të kufizuara do të jenë me leje administrative.
“Të gjithë qytetarëve tanë u urojmë të kalojnë sa më shpejt këtë situatë. Zoti e ruajtë vendin tonë nga çdo fatkeqësi natyrore,” – thuhet në njoftimin e Prefekturës.
AFAD paralajmëron qytetarët: “Mos hyni në ndërtesa të dëmtuara”
Pas tërmetit, AFAD u ka bërë thirrje qytetarëve të qëndrojnë larg ndërtesave të dëmtuara dhe të shmangin panikun:
“Mos hyni në struktura të rrezikuara, përdorni vetëm SMS dhe aplikacione interneti për komunikim dhe ndiqni udhëzimet zyrtare,” – thekson agjencia.
Lëkundje të ndjera edhe në Izmir e Manisa
Guvernatorët e Izmirit dhe Manisës konfirmuan se tërmeti është ndjerë qartë edhe në këto qytete, por pa dëme të raportuara. Ekipet e emergjencës kanë nisur inspektimet në terren, ndërsa banorët kanë kaluar natën jashtë në frikë nga pasgoditjet.