Një tjetër zyrtar i lartë vendor përballet me drejtësinë. Kryebashkiaku i Shkodrës, Benet Beci, është marrë zyrtarisht i pandehur nga Prokuroria e Posaçme Kundër Korrupsionit dhe Krimit të Organizuar, pas një hetimi që ka zgjatur më shumë se një vit.
Sipas informacioneve të siguruara, Beci është thirrur disa herë nga SPAK dhe këtë herë ka qëndruar për rreth dy orë përpara grupit të hetimit, në cilësinë e të dyshuarit për shkelje të barazisë në tendera. Hetimi pritet të përmbyllet dhe dosja të kalojë për shqyrtim në Gjykatën e Posaçme Antikorrupsion.
Burime pranë çështjes bëjnë me dije se procedimi penal është regjistruar në tetor të vitit 2024, ndërsa gjatë vitit 2025 hetimet janë intensifikuar nga prokurori i çështjes, Dritan Prençi. Dyshimet e SPAK lidhen me një tender me vlerë afro 700 mijë euro, të zhvilluar në vitin 2019, për një projekt kërkimor në sektorin energjetik.
Përveç kryebashkiakut, nën hetim ndodhen edhe disa anëtarë të komisionit të vlerësimit të ofertave, të cilët dyshohet se kanë pasur rol në shkeljen e procedurave ligjore gjatë procesit të prokurimit.
Deri më tani, informacionet mbeten jozyrtare, pasi as Prokuroria e Posaçme dhe as Benet Beci nuk kanë dhënë detaje publike mbi përmbajtjen e dosjes. Kryebashkiaku socialist ka zgjedhur të heshtë, duke mos iu përgjigjur interesimit të mediave.
Marrja e Benet Becit si i pandehur shënon një tjetër zhvillim të rëndësishëm në hetimet e SPAK ndaj zyrtarëve të nivelit të lartë, duke forcuar pritshmëritë për çuarjen përpara të çështjeve që lidhen me abuzimet me fondet publike dhe procedurat e dyshuara korruptive në pushtetin vendor.