Sany Dimitri ka folur hapur për herë të parë mbi përplasjet publike me kolegen e tij Rozana Radi, duke hedhur poshtë zërat që i lidhin mosmarrëveshjet mes tyre me para apo angazhime koncertesh.
Në një intervistë për një revistë artistike, këngëtari grek ka sqaruar se spekulimet që kanë qarkulluar në media nuk përputhen me realitetin. Sipas tij, konfliktet e përfolura nuk kanë asnjë lidhje me çështje financiare apo ndarje fitimesh.
“Nuk grindem për para apo për koncerte. Gjithçka që është thënë për financat nuk është e vërtetë. Çështjet që janë përmendur për postime apo mosmarrëveshje të tjera nuk pasqyrojnë realitetin,” është shprehur Dimitri.
Ai ka theksuar se marrëdhënia mes tij dhe Rozana Radit ka qenë gjithmonë strikte profesionale dhe kurrë personale. Sipas tij, bashkëpunimi i tyre ka funksionuar vetëm në kuadër artistik, pa krijuar miqësi apo lidhje të tjera jashtë skenës.
“Ishte thjesht një njohje dhe bashkëpunim profesional. Nuk kemi pasur ndjenja miqësore, as më parë dhe as tani,” ka deklaruar këngëtari.
Një nga momentet që, sipas Dimitrit, ka krijuar tension ka qenë performanca e Rozana Radit pas daljes së saj nga një format televiziv, kur ajo interpretoi këngën “Akoma” pa praninë e tij në skenë. Edhe pse pranon se ligjërisht nuk kërkohej leja e tij, ai shprehet se nga pikëpamja artistike një duet duhet të interpretohet nga të dy këngëtarët.
“Një duet merr kuptim kur të dy artistët janë bashkë në skenë. Edhe pse nuk kishte nevojë për lejen time, ndjeva se mungesa ime e zbehte idenë e bashkëpunimit,” ka shtuar ai.
Deklaratat e Dimitrit vijnë në një moment kur marrëdhënia mes dy artistëve ka qenë shpesh objekt diskutimi publik, sidomos pas suksesit të tyre të përbashkët në një event muzikor. Me këtë dalje, këngëtari synon të mbyllë spekulimet dhe të qartësojë se përplasja nuk ka qenë kurrë çështje parash, por perceptimesh dhe qasjesh artistike.