Një skandal i rëndë ushqimor ka tronditur disa vende të Bashkimit Europian, pasi në produkte për fëmijë të kompanisë HiPP është zbuluar prania e helmit për minj. Rasti u identifikua fillimisht në Austri, ku autoritetet ndërhynë menjëherë duke urdhëruar tërheqjen e produktit nga tregu.
Policia austriake konfirmoi se një kavanoz 190 gramësh me përmbajtje karota dhe patate, i raportuar nga një konsumator, rezultoi i kontaminuar me substancë toksike. Si masë urgjente sigurie, produktet u hoqën nga më shumë se 1,500 supermarkete Spar në të gjithë Austrinë.
Sipas hetimeve paraprake, ekziston dyshimi serioz se bëhet fjalë për një ndërhyrje kriminale të jashtme në zinxhirin e shpërndarjes. Vetë kompania HiPP deklaroi se nuk mund të përjashtohet mundësia që produktet të jenë manipuluar qëllimisht, duke e cilësuar situatën si kritike dhe potencialisht kërcënuese për jetën e fëmijëve.
Autoritetet paralajmërojnë se kavanozat e prekur mund të identifikohen përmes një afisheje me rreth të kuq në fund. Gjithashtu, çdo kapak i hapur, i dëmtuar apo mungesa e vulës mbrojtëse duhet të konsiderohet sinjal alarmi. Në disa raste është raportuar edhe erë e pazakontë nga produkti.
Rasti nuk është i izoluar. Teste laboratorike fillestare në produkte të sekuestruara në Republikën Çeke dhe Sllovaki kanë zbuluar gjithashtu praninë e një substance toksike, duke ngritur shqetësime për një përhapje më të gjerë të problemit në rajon.
Ndërkohë, zinxhiri i supermarketeve Spar theksoi se tërheqja e produkteve është një masë paraprake dhe se deri tani nuk ka indikacione për përhapje në vendet e tjera. Konsumatorëve u është bërë thirrje të mos konsumojnë asnjë produkt të blerë nga Spar në Austri dhe të kërkojnë rimbursim të plotë.
Policia ka këshilluar gjithashtu që çdo person që ka pasur kontakt me këto produkte të lajë duart menjëherë, për të shmangur çdo rrezik të mundshëm nga ekspozimi ndaj substancave të rrezikshme.
Ngjarja ka ngritur alarmin në të gjithë Europën për sigurinë ushqimore dhe kontrollin e zinxhirit të furnizimit, veçanërisht kur bëhet fjalë për produkte të destinuara për fëmijë.