Një ngjarje e rëndë ka tronditur komunitetin e alpinizmit dhe të kërkim-shpëtimit në Shqipëri. Erkin Lika, 39 vjeç, dyshohet se ka humbur jetën pasi u rrëzua nga shkëmbinjtë pranë Urës së Vashës, në zonën e Klosit, gjatë pasdites së së shtunës. Sipas raportimeve paraprake, ai ka rënë në një zonë të thellë shkëmbore, ndërsa ndodhej së bashku me grupin e tij.
Sipas informacioneve të deritanishme, Lika ishte pjesë e një ekipi të angazhuar në aktivitete kërkim-shpëtimi dhe njihej si një alpinist i apasionuar. Dyshohet se në momentin e ngjarjes ai po fotografonte pjesëtarët e grupit, kur ka rrëshqitur dhe ka rënë në humnerë.
Menjëherë pas sinjalizimit janë mobilizuar ekipet e emergjencës dhe shërbimet e kërkim-shpëtimit për të ndërhyrë në terrenin e vështirë ku ndodhi aksidenti. Operacioni vijon në kushte të vështira për shkak të relievit të thepisur të zonës.
Autoritetet pritet të sqarojnë rrethanat e plota të ngjarjes pas përfundimit të veprimeve hetimore dhe operacionit të kërkimit. Deri tani, informacionet mbeten paraprake dhe nuk ka ende një njoftim zyrtar për shkaqet e sakta të aksidentit.