Kreu i Partisë Demokratike, Sali Berisha, ka lëshuar akuza të forta ndaj qeverisë, duke deklaruar se Shqipëria po përjeton një krizë të thellë ekonomike ku pagat minimale mbeten të pandryshuara, ndërsa çmimet e produkteve bazë janë rritur në nivele të papërballueshme.
Në një konferencë për mediat, Berisha solli edhe krahasime me vendet e tjera të rajonit dhe të Europës, duke e cilësuar gjendjen si “absurde”.
Paga minimale më e ulëta, paga e zyrtarëve më e larta
Berisha akuzoi qeverinë se ka braktisur qytetarët e thjeshtë dhe se në Shqipëri është krijuar një hendek i thellë mes punonjësve dhe zyrtarëve të lartë:
“Shqipëria ka pagën minimale më të ulët nga të gjitha vendet evropiane, ndërkohë që paga e zyrtarëve më të lartë është e paprecedentë. Asnjë president, asnjë kryeministër, asnjë gjykatës në Ballkan nuk merr rrogën e Altin Troplinit – mbi 7 mijë euro në muaj. Një pagesë e tillë nuk njihet askund tjetër.”
Çmime të papërballueshme për qytetarët
Sipas Berishës, ndërsa pagat e punëtorëve nuk janë rritur nga viti 2023 deri në vitin 2025, çmimet kanë marrë përpjetë:
- Një paketë detergjenti për lavatriçe shitet 35 euro në Shqipëri, ndërkohë që në Gjermani kushton 17–18 euro.
- Djathi shitet dy deri në tre herë më shtrenjtë se në SHBA dhe Greqi.
“Me këto çmime, njerëzit nuk munden më të blejnë produkte elementare. Kemi rrezik të rikthehemi në vitin 1992, kur vendi përjetoi një epidemi të zgjebes për shkak të varfërisë ekstreme,” – paralajmëroi ai.
Kritika ndaj manipulimit të shifrave
Berisha e akuzoi qeverinë dhe institucionet statistikore se po manipulojnë opinionin publik:
“Mos dëgjoni gënjeshtrat e Edi Ramës dhe të INSTAT-it. Eurostat flet qartë: pagat minimale nuk janë rritur, ndërkohë që çmimet janë stratosferike.”
Një krizë që prek çdo familje
Mesazhi i Berishës ishte i qartë: qeveria po e çon vendin drejt një varfërie të thellë, ku të ardhurat nuk përballojnë më as shpenzimet bazë të jetesës. Sipas tij, kjo është një politikë shkatërruese që lë qytetarët të pambrojtur përballë inflacionit dhe rritjes së pandalshme të çmimeve.