Qeveria ka hapur një tjetër thirrje për të afruar të rinj dhe profesionistë pranë strukturave shtetërore, këtë herë në fushën e komunikimit publik. Përmes një njoftimi të bërë publik nga kryeministri Edi Rama, prezantohet “Rrjeti MIA” si pjesë e ndryshimeve që ai i quan “Kthesa e Mandatit të Katërt”.
Çfarë njoftoi Rama
Sipas njoftimit të publikuar nga kryeministri, thirrja u drejtohet profesionistëve, të rinjve, ekspertëve dhe krijuesve që duan të kontribuojnë në komunikimin publik.
Ftesa lidhet me përfshirjen në strukturat e komunikimit të institucioneve qendrore ose me bashkëpunimin me Agjencinë për Media dhe Informim përmes ideve, projekteve dhe zgjidhjeve të reja.
Fokus te komunikimi, media dhe teknologjia
Sipas versionit zyrtar, kërkohen profile me aftësi në komunikim, media, rrjete sociale, teknologji, inteligjencë artificiale, video, dizajn, të dhëna dhe formate të reja komunikimi.
Në thelb, qeveria po kërkon të zgjerojë rrjetin e vet të komunikimit publik, duke e paraqitur këtë si hapje të re për ata që duan të shërbejnë në sektorin publik.
Si parashikohet aplikimi
Të interesuarit duhet të paraqesin një ide, projekt ose zgjidhje konkrete për mënyrën se si institucionet komunikojnë me qytetarët.
Po ashtu, kërkohet edhe dërgimi i një videoje deri në 60 sekonda, ku aplikanti prezanton idenë e tij.
Afati i fundit
Aplikimet do të qëndrojnë të hapura deri më 10 shtator 2026, në orën 23:00.
Informacioni i plotë për thirrjen është publikuar në faqen e dedikuar të MIA-s.
Thirrja vjen në një moment kur qeveria po e paketojnë zgjerimin e strukturave të komunikimit si pjesë të riorganizimit të mandatit të katërt.
Mbetet për t’u parë se sa hapësirë reale do t’u jepet ideve të reja dhe sa kjo nismë do të prodhojë përmirësim të komunikimit me qytetarët, përtej nevojës së institucioneve për një prezencë më të fortë publike.