Situata e zjarreve në vend mbetet problematike, me 12 vatra ende aktive në disa qarqe, ndërsa institucionet raportojnë angazhim të shtuar në terren dhe nga ajri. Sipas bilancit zyrtar, janë evidentuar 22 vatra zjarri në rang kombëtar, por vetëm një prej tyre rezulton e shuar plotësisht.
Bilanci zyrtar: 22 vatra, por 12 mbeten aktive
Sipas strukturave të Mbrojtjes Civile, 12 vatra janë aktive, 9 mbahen nën mbikëqyrje dhe 1 është shuar. Në operacione janë përfshirë 498 forca vendore e lokale dhe 314 efektivë të Forcave të Armatosura, së bashku me mjete zjarrfikëse, mjete mbështetëse, autoambulanca, dron dhe 4 operacione me helikopterë.
Shifrat tregojnë një angazhim të gjerë operacional, megjithatë harta e vatrave aktive në disa qarqe tregon se situata vijon të mbetet e hapur dhe e ndjeshme, sidomos në zonat me terren të vështirë dhe masive pyjore.
Tiranë dhe Dibër, zjarre aktive në terrene malore
Në qarkun Tiranë, zjarri në Malin e Dajtit vijon aktiv në sipërfaqe me pyll ahu dhe shkurre. Në terren janë angazhuar efektivë zjarrfikës, forca të administrimit pyjor, Forcat e Armatosura, mjete dhe një helikopter. Versioni zyrtar thotë se nuk ka rrezik për zonat e banuara. Ndërkohë, vatra në Kryezi të Kavajës është shuar, ndërsa ajo në Malin e Bërzhitës mbahet nën monitorim.
Në qarkun Dibër mbeten aktive vatrat në Vajkal të Bulqizës, Lundre–Madhesh në Mat, Qafën e Helmes në Bulqizë dhe Cerrujë–Mali i Allushit në Klos. Në Lundre–Madhesh operacioni mbështetet edhe nga Forcat e Armatosura, mjete dhe autoambulancë. Edhe këtu institucionet raportojnë se nuk ka rrezik për banesat.
Lezhë dhe Shkodër, ndër zonat me angazhimin më të madh
Në Lezhë, aktive mbeten vatrat në Gallatë të Kurbinit dhe në zonën Kalivaç–Zimaj–Kashnjet. Në Gallatë, sipas raportimit zyrtar, ndërhyrja po vështirësohet nga terreni, ndërsa në zonën Kalivaç–Zimaj–Kashnjet janë angazhuar 100 forca vendore, pyjore e vullnetare, të mbështetura nga 124 efektivë të Forcave të Armatosura, 16 mjete, 2 autoambulanca dhe 1 helikopter. Nuk raportohen banesa në rrezik.
Në qarkun Shkodër, situata paraqitet në disa pika njëherësh. Zjarri në Mnelë të Vogël të Vau-Dejës vijon aktiv dhe po mbështetet edhe nga Forcat e Armatosura, mjete zjarrfikëse dhe një helikopter. Punë po kryhet edhe në zonën Bardhaj–Myselim, ndërsa në Malin e Tërbunit në Pukë vatra vijon aktive në pyll me pishë. Vatra të tjera në këtë qark mbahen nën mbikëqyrje.
Vatra aktive edhe në Elbasan e Vlorë, disa zona të tjera nën monitorim
Në qarkun Elbasan, zjarri në Gurëshpatë të Librazhdit vijon aktiv, ndërsa vatra në Malin e Qukësit në Prrenjas është nën mbikëqyrje. Në Vlorë, në Qesarat të Finiqit zjarri i shfaqur gjatë ditës vijon aktiv dhe është ndërhyrë edhe me helikopter, ndërsa vatra në Bolenë të Himarës mbahet nën vëzhgim.
Në Fier, vatrat në Peshtan dhe Çërrilë janë nën mbikëqyrje për të shmangur riaktivizimin. E njëjta gjendje raportohet edhe në Kukës, ku vatra në Mamëz mbahet nën kontroll, si dhe në Durrës, ku zjarri në Halil të Krujës është izoluar dhe shuar, por zona po monitorohet.
Institucionet deklarojnë se prioritet mbetet mbrojtja e jetës, banesave dhe pasurisë së qytetarëve. Megjithatë, me 12 vatra ende aktive në disa qarqe, situata mbetet e ndjeshme dhe nën presion operacional në disa prej zonave më problematike të vendit.