Partia Demokratike ka ndërmarrë një hap historik për rivendosjen e drejtësisë dhe të dinjitetit të lidershipit të saj. Në prag të zgjedhjeve të 11 majit, PD ka firmosur një kontratë lobimi prej 6 milionë dollarësh me kompaninë prestigjioze amerikane Continental Strategy, një hap strategjik për të garantuar përfaqësimin dinjitoz të interesave të saj dhe për të forcuar lidhjet me administratën dhe Kongresin e Shteteve të Bashkuara të Amerikës.
Kontrata është firmosur më 4 prill nga sekretari i përgjithshëm i PD-së, Flamur Noka, dhe është garantuar nga shtetasi shqiptar në SHBA, Nuredin Seçi, duke treguar mbështetjen e fuqishme të komunitetit shqiptaro-amerikan për kauzën e Partisë Demokratike dhe të Sali Berishës.
Continental Strategy, e udhëhequr nga ish-ambasadori dhe këshilltari i Presidentit Trump, Carlos Trujillo, do të ofrojë shërbime lobimi, avokimi dhe nisma strategjike për një periudhë dyvjeçare. Kjo lëvizje vjen në një kohë kyçe, kur pritet që marrëdhëniet mes PD-së dhe institucioneve amerikane të hyjnë në një fazë të re bashkëpunimi.
Në thelb të kësaj përpjekjeje qëndron objektivi madhor: heqja e padrejtë e shpalljes non-grata ndaj Sali Berishës.
Përmes kësaj kontrate, do të promovohet para vendimmarrësve amerikanë e vërteta mbi rolin historik të Berishës në ndërtimin e demokracisë shqiptare dhe mbrojtjen e vlerave euroatlantike në rajon.
Ekipi i fuqishëm i Continental Strategy, me lidhje të forta me figurat kyçe të Partisë Republikane si Katie Wiles dhe Senatori Marco Rubio, është një garanci shtesë për suksesin e kësaj nisme. Kjo firmë ka dëshmuar kapacitetin për të ndikuar në nivelet më të larta të politikës amerikane dhe për të sjellë ndryshime reale në qasjen ndaj aleatëve të besueshëm të SHBA-së, siç është Sali Berisha.
Ky është vetëm fillimi i një beteje për të rikthyer nderin, të vërtetën dhe për të ndërtuar një të ardhme më të drejtë për Partinë Demokratike dhe Shqipërinë.