Kryeministri Edi Rama ka zgjedhur t’u flasë me tone ironike dhe disiplinuese deputetëve të rinj të Partisë Socialiste, duke i udhëzuar publikisht që të rikthehen në “shkollë” përmes një sesioni të posaçëm në Akademinë Politike të PS-së.
Në fjalimin e mbajtur gjatë festës së fitores së mandatit të katërt, Rama shprehu qartë se ky mandat nuk do të jetë një piedestal për të treguar epërsi ndaj të tjerëve, por një fazë pune intensive që duhet të nisë menjëherë.
“Deputetët e rinj të rikthehen në studime”
“Akademia Politike duhet të hapë një sesion të posaçëm për të gjithë deputetët që hyjnë për herë të parë në Kuvend,” – deklaroi Rama, duke theksuar se pa një përgatitje serioze dhe pa thellim njohurish politike e institucionale, askush nuk mund të jetë përfaqësues dinjitoz i qytetarëve.
Porosi për veteranët: Përgatituni për zgjedhjet vendore
Përveç të rinjve, edhe veteranët e PS-së morën udhëzime të qarta: të nisin menjëherë punën për zgjedhjet e ardhshme lokale, duke treguar se Partia Socialiste është në modalitet fushate të përhershme, edhe sapo ka mbyllur një proces zgjedhor.
Një “kohë e artë” që duhet shfrytëzuar
Kryeministri përmendi domosdoshmërinë për të organizuar mbledhje të mëdha dyditore me grupe kyçe interesi për të diskutuar sfidat e mandatit të katërt.
“Lista është e hapur për propozime. Thelbi është se kjo është një kohë e artë dhe një nevojë jetike. Ta bëjmë shteruese dhe jam i bindur se do mësojmë shumë,” – tha ai.
Fjalimi që la shije përçmimi dhe kontrolli
Toni përçmues dhe paternalist i Ramës ndaj deputetëve të sapo zgjedhur ka ngjallur debat në rrjetet sociale dhe në opinionin politik. Fjalët e tij janë interpretuar si një formë kontrolli vertikal, që dëshmon se edhe në mandatin e katërt, Edi Rama mbetet i vetmi qendër vendimmarrjeje dhe disiplina në PS mbetet çelësi i sundimit të tij.
Në vend të një fryme të re, Rama duket se kërkon të instalojë një model ku deputetët nuk janë përfaqësues të qytetarëve, por nxënës të bindur të Akademisë së Partisë. Kjo filozofi rikthen hijet e një partie-shtet ku linja politike mësohet, përsëritet dhe nuk vihet kurrë në diskutim.