Në një zhvillim të pazakontë për Bashkimin Europian, Presidentja e Komisionit Europian Ursula von der Leyen po përballet me një votëbesim në Parlamentin Europian, një ngjarje që nuk ka ndodhur prej më shumë se një dekade.
Votimi është thirrur nga ligjvënës të ekstremit të djathtë, të cilët e akuzojnë von der Leyenin për keqmenaxhim dhe mungesë transparence, përfshirë komunikime të dyshimta me kreun e Pfizer, keqpërdorim të fondeve të BE-së dhe ndërhyrje në zgjedhjet në Gjermani dhe Rumani.
Për të kaluar mocioni i mosbesimit, nevojiten dy të tretat e votave, një prag që konsiderohet i paarritshëm për opozitën, pasi shumica e grupeve politike kanë shprehur mbështetjen për presidenten aktuale të Komisionit.
Megjithatë, kryeministri hungarez Viktor Orban ka dalë në krye të fushatës për rrëzimin e saj, duke e quajtur këtë moment si “përballje mes elitës imperialiste të Brukselit dhe patriotëve europianë”.
“Është koha të largoheni! Thelbi i udhëheqjes është përgjegjësia”, – ka deklaruar Orban në një mesazh publik.
Konflikti i vazhdueshëm Von der Leyen – Orban
Marrëdhëniet mes Komisionit Europian dhe qeverisë hungareze janë të tensionuara prej vitesh, kryesisht për shkak të politikave të Budapestit që konsiderohen si anti-demokratike nga Brukseli. Për këtë arsye, BE i ka ngrirë miliarda euro fonde Hungarisë.
Von der Leyen nuk pritet të marrë pjesë në seancën plenare në Strasburg, por gjithsesi mbështetja për të mbetet solide brenda Partisë Popullore Europiane, grupi më i madh në Parlamentin Europian.
Ky votim shihet më shumë si një manovër politike e ekstremit të djathtë europian, në përpjekje për të dobësuar autoritetin e lidershipit të BE-së, përpara sfidave madhore që e presin unionin – nga lufta në Ukrainë, deri te krizat ekonomike dhe integrimi i vendeve të Ballkanit.