Denis Brajoviç, i arrestuar në Emiratet e Bashkuara Arabe në shkurt të vitit 2024, pritet të ekstradohet sot në Shqipëri. Ai akuzohet për vrasjen e Gjin Ndojit në gusht të vitit 2020, një atentat i organizuar në mënyrë të strukturuar nga grupi kriminal i drejtuar nga Behar Bajri.
Sipas përgjimeve të siguruara përmes aplikacionit të enkriptuar “SKY ECC”, që dolën gjatë operacionit të koduar “Metamorfoza”, Brajoviç kreu atentatin dhe pas ekzekutimit informoi organizatorët me mesazhe të koduara.
Vrasja Dhe Mesazhi Për Martinajn
Pas vrasjes së Ndojit, Brajoviç i dërgoi një mesazh Behar Bajrit, duke i kërkuar që Edmond Preka, personi që kishte siguruar transportin, ta priste pasi ishte në afërsi. Më pas, ai i shkruan Ervis Martinajt, duke përdorur fjalën e koduar “kryvi” – sinjal që vrasja ishte kryer me sukses.
Gjin Ndoji njihej edhe me identitetet Gjin Boriçi apo Ndue Gjini, dhe sipas hetimeve, ka qenë objektiv i drejtpërdrejtë i grupit të strukturuar.
Përgjimet: Çfarë Zbulojnë Mesazhet Në SKY ECC
Komunikimet e zbardhura tregojnë për një koordinim të ngushtë mes Brajoviçit, Behar Bajrit, Edmond Prekës dhe personave të tjerë të përfshirë:
- Në orën 00:27, Denis Brajoviç njofton Martinajn: “He vëlla, më shkruaj këtu se jam duke lënë cel në shqip, tu dal jam, prit t’vi.”
- Në 01:54, ai i shkruan Beharit: “Para e kemi.”
- Në 02:02, vjen mesazhi që vërteton krimin: “Kryvi, jemi në Bushat dhe të na presi aty ai, se jemi afër.”
- Në 02:06, ai i shkruan sërish Martinajt: “Kryvi.”
- Komunikimi vazhdon me njoftime për lëvizjen e autorëve, fshehjen e përkohshme dhe sigurinë e kthimit të tyre.
Përfshirja E Figurave Të Tjera
Në biseda përmenden edhe emra si Pëllumb Gjoka, i cili informohet për përfundimin e misionit dhe uron: “Kjoft me zotin, futja gjumit”. Ndërsa Zeqo përmendet si personi që duhej të siguronte vendqëndrimin pas atentatit.
Hetuesit kanë ndërtuar një strukturë të plotë kriminale, ku çdo person kishte një rol të përcaktuar: logjistikë, transport, urdhërues, ekzekutues dhe mbështetës.
Një Krim I Organizuar Në Detaj
Provat e siguruara në aplikacionin “SKY” hedhin dritë mbi mënyrën se si funksionojnë grupet kriminale të sofistikuara, ku urdhrat për jetën dhe vdekjen jepen përmes fjalëve të koduara, dhe ekzekutimi i vrasjeve konfirmohet në orët e para të mëngjesit me një “kryvi”.
Ekstradimi i Brajoviç pritet të sjellë zhvillime të reja në dosjen e rëndë të drejtësisë shqiptare, sidomos për të zbardhur rolin e Ervis Martinajt, i cili rezulton ende i zhdukur dhe i përfolur si “peshku i madh” i botës së krimit në Shqipëri.