SPAK ka goditur një tjetër rrjet kriminal të trafikut të drogës dhe pastrimit të parave, duke nxjerrë në pah atë që prej vitesh dyshohet: paraja e krimit nuk qëndron më në rrugë, por futet në biznese, tendera, makina luksoze dhe kompani që operojnë në mes të Tiranës.
Në kuadër të megaoperacionit të zhvilluar në bashkëpunim me Policinë e Shtetit, janë lëshuar 20 masa sigurie, nga të cilat 15 “arrest me burg” dhe 5 “arrest në shtëpi”.
Mes personave të përfshirë rezulton edhe biznesmeni Edmond Jaupi, CEO i Daikin/ESC, kompani e njohur në tregun e kondicionimit, për të cilin është caktuar masa “arrest në shtëpi”.
Por emri i Jaupit e bën çështjen edhe më delikate politikisht dhe institucionalisht. Ai rezulton të jetë vëllai i Elidiana Çelajt, aktualisht drejtoreshë e AKUK-ut, ndërsa më herët ka mbajtur postin e drejtoreshës së bizneseve VIP në Drejtorinë e Tatimeve.
Pra, në një dosje ku SPAK flet për drogë, pastrim parash dhe struktura kriminale, dalin edhe lidhje me njerëz që kanë qenë pranë administrimit të bizneseve të mëdha dhe institucioneve publike.
Ky është pikërisht problemi i madh shqiptar: krimi nuk mjaftohet më me aktivitetin ilegal, por kërkon fasadë biznesi, mbulim institucional dhe qarkullim parash në sektorë “të respektueshëm”.
Ndërkohë, në të njëjtin operacion janë sekuestruar edhe makina luksoze të lidhura me biznesmenin e “Top Seven”, ndërsa në kërkim është shpallur edhe Ilir Shtufi, i dyshuar si pjesë e grupit kriminal të kokainës dhe pastrimit të parave.
Shtufi është një tjetër emër që ngre pikëpyetje të rënda, pasi në media është raportuar se ai ka përfituar tendera publikë në sektorin e rrugëve, duke e kthyer edhe një herë vëmendjen te lidhja e errët mes parasë së krimit, biznesit dhe pushtetit.
SPAK tashmë ka në dorë jo vetëm një dosje penale, por një provë të madhe politike: të tregojë nëse do të godasë vetëm ushtarët dhe administratorët formalë, apo edhe rrjetin e vërtetë që ka lejuar pastrimin e parave në zemër të ekonomisë shqiptare.
Sepse në Shqipëri, paratë e drogës nuk pastrohen në errësirë.
Ato pastrohen me kompani, me tendera, me makina luksoze, me zyra, me kontrata dhe me heshtjen e atyre që duhej t’i kontrollonin.