Një tjetër shpërthim i Anak Krakatau ka sjellë bllokim të fortë në trafikun ajror të Indonezisë, duke pezulluar qindra lëvizje në aeroportin ndërkombëtar të Xhakartës dhe duke lënë mijëra pasagjerë përballë anulimeve, pritjeve dhe pasigurisë mbi vijimin e udhëtimeve.
Hiri vullkanik bllokon aeroportin kryesor të Xhakartës
Sipas autoriteteve indoneziane, 209 fluturime u pezulluan në Aeroportin Ndërkombëtar Soekarno-Hatta pasi hirin vullkanik u konstatuar në hapësirën ajrore pranë kryeqytetit të dielën në mëngjes.
Ndërprerja ka prekur më shumë se 22 mijë pasagjerë dhe ka goditur veçanërisht linjat drejt dhe nga Singapori. Mes destinacioneve të prekura përmenden edhe Doha, Sidnei dhe Kuala Lumpuri.
Sipas njoftimit zyrtar, pezullimi i operacioneve u zgjat deri në orën 13:30, duke krijuar një tjetër episod kaosi në një nga nyjet më të rëndësishme ajrore të rajonit.
Aktivitet i fortë që nga e premtja
Anak Krakatau hyri në një fazë aktiviteti të fuqishëm vonë të premten. Autoritetet raportuan shpërthime të njëpasnjëshme, lëkundje sizmike, dalje lave dhe zhurma të forta në zonat përreth.
Dy shpërthime të tjera u regjistruan herët të dielën, çka tregon se situata mbetet e paqëndrueshme dhe me ndikim të drejtpërdrejtë në jetën e përditshme dhe lëvizjen e qytetarëve.
Banorët përballë hirit, shkollat dhe peshkatarët tërhiqen
Deri tani nuk ka paralajmërim për cunami nga aktiviteti i fundit, sipas versionit zyrtar. Megjithatë, kjo nuk e ka zbutur ndikimin në terren, ku hiri vullkanik ka krijuar probleme për komunitetet pranë vullkanit.
Ministria e Shëndetësisë u ka kërkuar qytetarëve të qëndrojnë brenda dhe të përdorin maska për të shmangur irritimet në sy, lëkurë dhe rrugët e frymëmarrjes.
Disa shkolla kanë anuluar aktivitetet pasi nxënës dhe banorë raportuan irritim të syve, ndërsa peshkatarët kanë pezulluar daljet në det për shkak të pranisë së hirit.
Një vullkan me histori tragjike
Anak Krakatau, i njohur si “Fëmija i Krakatoas”, ndodhet në Ngushticën Sunda, mes ishujve Java dhe Sumatra.
Ky vullkan mbetet një pikë e ndjeshme jo vetëm për shkak të aktivitetit të shpeshtë, por edhe prej kujtesës së dhjetorit 2018, kur shembja e një pjese të tij shkaktoi një cunami me mbi 400 viktima.
Indonezia ndodhet në Unazën e Zjarrit të Paqësorit, një nga zonat më aktive në botë për tërmete dhe shpërthime vullkanike, ndaj çdo episode i tillë sjell pasoja të menjëhershme për transportin, ekonominë lokale dhe sigurinë publike.
Për momentin, ndikimi më i dukshëm është tek trafiku ajror dhe komunitetet pranë zonës së shpërthimit, ndërsa situata varet nga intensiteti i mëtejshëm i aktivitetit vullkanik dhe nga vendimet operative të autoriteteve indoneziane.